122 gazte espedientatu dituzte Gasteizen, osasun-arauak ez betetzeagatik

Gasteizko Udaltzaingoak zehapen-espedienteak ireki dizkie 122 gazteri (gehienak adingabeak) ostiralean eta larunbatean, koronabirusaren aurkako arauak bete gabe, Ibaiondo auzoan biltzeagatik.

Ostiralean, hainbat gazte bildu ziren Zumaiako plazan eta inguruetan, horrek Udaltzaingoak eta Ertzaintzak jardutea eragin zuen. Hala ere, larunbatean egoera errepikatu zen eta dozenaka gazte elkartu ziren berriro osasun arauak errespetatu gabe: sei pertsonatik gorako taldeak zeuden, ez zeramaten maskararik eta ez zuten zaindu beharreko gutxieneko tartea gordetzen.

Udaltzaingoak jakitera eman duenez, agenteek 122 zigor-proposamen egin zituzten bi egunen artean; espediente horiek Eusko Jaurlaritzari bidaltzen dizkiote, isunak bideratzeko (600 eurorainokoak izan daitezke).

Egoerak bizilagunen artean alarma piztu zuen, eta bi kuadrillak elkar jotzeko hitzordua jarri zutela zabaldu zen. Gorka Urtaran alkateak azpimarratu duenez, "Gasteizen ez dago banda antolaturik", bi gaztek elkar jotzeko hitzordua jarri zuten sare sozialetatik, eta horrek dei efektua eragin zuela.

Urtaranek aitortu duenez, gazteak Zumaia plazan biltzea ohikoa da. Asteburu honetan, "Udaltzaingoak horren berri zuenez", patruilak bidali zituzten inguru horretara eta espedientea ireki zien bertaratu zirenei.

Alkateak erabakiak hartu dituztela iragarri du aurrera begira horrelakorik ez errepikatzeko. Horren esanetan, areagotu egingo dute "udaltzaingoen presentzia Zumaia plazan eta inguru horretan horrelako gazte pilaketak ekidite aldera" eta "asteburu honetan isuna jaso duten adingabeen familiekin harremanetan jarriko gara haiek ere kontzientzia ditzaten beren seme-alabak holako arrisku egoeraz ekidin beharraz".