Gizartea -
Elkarrizketa
Basaras: "Argi dago datozen asteetan kasuek gora egingo dutela"
EHUko mikrobiologoaren ustez, "neurri egokiena itxialdi erabatekoa ezartzea litzateke, baina jakin badakit ezin garela horrela egon denbora guztian".
EITB Media
Jaurlaritzak covid-19aren kutsatzeak saihesteko Gabonetan neurriak zorroztu dituela eta, Miren Basaras mikrobiologian aditu eta EHUko irakasleak herritarren "erantzukizunari" deia egin dio: "Abenduaren 24an eta 31n ez ditzagun eguerdira aurreratu iluntzeko ohiko poteoak. Ez ditzagun zirrikituak bilatu bizimodu normala egiteko".
Izan ere, adituaren ustez, "argi dago datozen asteetan kasuek gora egingo dutela". Hala, norberari dagokio pandemiaren hirugarren olatua "dramatikoagoa ez izatea", ohartarazi du Radio Euskadin egin dioten elkarrizketa batean.
Argitu du bera erabateko itxialdi baten aldekoa dela, "hori izango litzateke neurri egokiena, baina jakin badakit ezin garela horrela egon denbora guztian", aitortu du.
Gabonetan mahai baten bueltan bil daitezkeen pertsona kopuruari (10, abenduaren 24an eta 25ean eta sei, hilaren 31n eta urtarrilaren 1ean) dagokionez, mikrobiologoak adierazi du "neurri apur bat eztabaidagarria" dela, baina azpimarratu du mezu orokorra dela "ahalik eta gutxien biltzea".
Basarasen esanetan, birus honek duen ezaugarrietako bat da "igoerak esponentzialak" direla, baina ez jaitsierak.
Erresuma Batuan atzeman duten aldaeraren harira, EHUko irakasleak azaldu du "oraindik asko" ikertu behar direla genoman egondako "moldaketa" horiek. "Badakigu gehiago kutsatzen dela, baina ez du ematen txertoaren eraginkortasunean edota gaixoak egin behar duen antigorputzen ekoizpenean eragingo duenik, eta hori ona da".
Azkenik, esan du txertoa edukita "errazagoa" dela aldaerei aurre egiteko moldaketa egitea.
_______________
Erredakzioan itzulia
