"Lehen aldiz koronabirusari erantzuteko arma bat dugu"

Koronabirusaren aurkako txertoak garraiatzeko erabili behar den logistika "oso prozesu konplexuak dira",  txertoak "segurtasun baldintza zorrotzetan" garraiatu behar direlako eta egun bat geroago iristea ez da garrantzitsua,  Gustavo Cillaren ustez.

Donostialdeako ESIko Mikrobiologia Zerbitzuko buruak Radio Euskadiko "Boulevard Informativo" saioan azaldu duenez, txertoak desizoztu ondoren "5 eguneko epea" dago jartzeko. Txertaketa "prozesu zaila" dela azpimarratu du.

Txertoak ematen duen babes handiena lortzeko , % 90, "2 dosiak jaso" behar dira. Txertoari buruzko zalantza asko daude oraindik. Izan ere, gaixotasuna prebenitzen duela jakin arren, ezezaguna da infekzioaz eta infekzioa transmititzeko aukeraz prebenitzen gaituen. Hala ere, Gustavo Cillak baieztatu du txertoa "covid-19aren aurkako funtsezko zutabea" dela. Nolanahi ere, hilabete asko beharko dira talde-immunitatea lortzeko eta birusaren transmisioa mozteko, horretarako herritarren ehuneko handia txertatzea beharrezkoa baita.

Argitu beharreko beste kontu bat da erantzun immuneak zenbat irauten duen eta oroitzapen-dosi bat x urtetik behin jartzea beharrezkoa izango den ala ez. Dena den, dakiguna da gaixotasunetik babestuko gaituela eta ospitaleetako eta ZIUetako presioa murriztuko duela.

Txertoaren garapen azkarraren ondorioz sor daitezkeen zalantzak direla eta, egoera "salbuespenezkoa" izan dela azaldu du, "lankidetza estua egon delako zientzialarien, fabrikatzaileen, osasun-sistemen eta abarren artean". Zientziak azken urteetan lortu dituen aurrerapen izugarriak eta lan estrategien aldaketak ere azpimarratu ditu. Horien ondorioz, garapen epeak asko laburtu dira.

Cillaren ustez, txertoa jarri nahi ez dutenak "ez dira behartu behar, konbentzitu baizik".