EAEk eta Nafarroak Erresuma Batuko aldaeraren 9 eta 4 kasu jakinarazi dituzte

Txosten baten arabera, Euskadin atzemandako hiru kasutan ezin izan da harreman epidemiologikorik ezarri Erresuma Batuarekin.

N.B.| EITB MEDIA

publikatuta: 2021/01/22 14:46 (UTC+1)

azken eguneratzea: 2021/01/26 10:32 (UTC+1)

Euskal Autonomia Erkidegoak eta Nafarroak, hurrenez hurren, Britainia Handiko aldaeraren bederatzi eta lau kasu jakinarazi dituzte, "VOCen 202012/01 Zirkulazioa (B.1.1.7) eta Espainiako osasun publikorako interesgarria den SARS-CoV-2aren beste aldaera batzuk" dokumentuan jasotakoaren arabera. Agiri hori Osasun Alertak eta Larrialdiak Koordinatzeko Zentroak egin du, mikrobiologiako Zentro Nazionaleko, arnas birusen eta gripearen laborategiko, Epidemiologiako Zentro Nazionaleko, Valentziako Biomedikuntza Institutuko eta Valentziako Unibertsitateko eta FISABIOko adituekin batera.

Kasu gehienak Erresuma Batuarekin erlazionatuta daude epidemiologikoki, baina Euskadin detektatutako hiru kasutan lotura hori "ezin izan da ezarri", txostenaren arabera.

Osasun Ministerioak ohartarazi duenez, aldaera horrek kutsatzeko arrisku handiagoa du, baina kutsatutako pertsonek "ez dute gaixotasun larririk izateko arrisku handiagorik", eta ez die eragiten txertoen immunitate naturalari eta eraginkortasunari.

Estatu mailan, 157 kasu jakinarazi dituzte, gehienak Andaluzian (37), Madrilen (28) eta Balear Uharteetan (25). Txostenaren arabera, aldaera Granadako hondakin-uretan zegoen abenduaren 17an.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu dira; beraz, agintariek emandakoei bakarrik egin kasu. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu covid-19a ez hedatzeko modurik eraginkorrena eskuak sarri garbitzea dela. Ahoa estaltzeko maskarak derrigorrezkoak dira EAEn eta Nafarroan. Iparraldean, espazio publiko itxietan, garraio publikoan eta udalerri eta hiri nagusietan da derrigorrezkoa.

Hau zure interesekoa bada, baliteke beste gai hauek ere izatea

Osakidetza Nafarroa Euskal Autonomia Erkidegoa Erresuma Batua Espainia Gaixotasunak Gizartea Eguneko albisteak Albisteak Zientzia Osasun albisteak Sendagaiak Txertoak Koronabirusa Zer egin daiteke Euskadin? Osasunbidea

EAEk eta Nafarroak Erresuma Batuko aldaeraren 9 eta 4 kasu jakinarazi dituzte

Esteka kopiatuta