Publizitatea
Itxi

2021/01/27

13:56

Gizartea

KORONABIRUSA

Covid-19aren aurkako txertoak funtzionatzen dutela adierazi du Margarita del Valek

EITB MEDIA

Del Valek azaldu duenez, oraindik hainbat zalantza daude txertoen eraginkortasunaren inguruan. Gainera, txerto gehiago ekoizteko eta lortzeko beharra azpimarratu du.

  • Margarita del Val.

    Margarita del Val. Argazkia: EITB

  • Whatsapp
  • Whatsapp
  • Telegram
  • Bidali

Margarita del Val birologo eta ikertzailearen ustez, gizartea "oso zorte ona" izaten ari da covid-19aren aurkako txertoekin. Azaldu duenez, "ez nuen espero inolako eraginik ez izatea", eta, egia esan, "ia txerto guztiak funtzionatzen ari dira", baina oraindik zalantza asko daude horien eraginkortasunari buruz.

Severo Ochoa Biologia Molekularreko Zentroko immunologo eta ikertzaile zientifikoaren esanetan, "txertoak sortzen jarraitu behar dugu", gero eta hobeto diseinatuta, koronabirusari aurre egiteko. Halaber, txertoek eragindako immunitateak eta immunitate "naturalak" birusarengandik babesten duten arren, Estatuan % 1eko heriotza tasa duen gaixotasun baten aurrean "arriskurik gabe" babestuko duen txerto bat "nahiago" duela esan du.

Del Valen arabera, datozen hilabeteetan txertoak kutsatzeak saihesteko eraginkorrak diren ala ez aztertuko dute, baina "oraingoz, txertoa jarri dutenek eta jarri ez dutenek eusteko neurriak mantendu behar ditugu".

Horren ustez, aurrerago jakingo dugu txertoek kutsaduratik babesteko eta, beraz, immunitate kolektiboa emateko gaitasuna duten, eta pazientzia izatea gomendatu du; izan ere, oraindik ez dakigu herritarren % 60ri txertoa jarrita immunitate kolektibo hori lortu ahalko den. "Geratzen zaigun zalantza bat da", zehaztu du.

Oraingoz, ez dakigu txertoek "heriotzatik babesten duten" ere, baina hori "oso denbora gutxian" jakingo da, milioika pertsona txertatutakoan.

Pertsona baten immunitateak zenbat iraun dezakeen galdetuta, birologoak esan du, urtarrilean ezagutu berri den ikerketa baten arabera, infektatu eta 5-8 hilabetera, organismoak birusaren aurka dituen "arma guztiek" funtzionatzen jarraitzen dutela herritarren ehuneko handi batean.

Horren ustez, birusaren aurkako "memoria immunitarioak urte asko iraungo du", eta, inor berriro infektatuz gero, "infekzio onberak" izango dira.

Del Valen hitzetan, oraindik ez dakite txertoek epe luzera begira zenbateraino babestuko duten, ezta txertoek eragindako antigorputzen erantzunak zenbat iraungo duen ere. "Kasurik okerrenean, lau hilabete baino ez badira, pertsona askok negu honetan bizirik irautea eta hurrengora hobeto iristea eragingo dute", esan du.

Adituak azaldu duenez, Estatuan bi txerto daude baimenduta, Pfizer eta Moderna konpainienak, "antzeko eraginkortasun, segurtasun eta diseinua dutenak", eta datorren ostiralean hirugarren bat iritsiko dela Europara. "Eta gehiago behar dugu", gaineratu du; izan ere, "herritarren % 85 eta % 90 artean" birusarekiko zaurgarriak dira oraindik.

Horren arabera, koronabirusa "ez da oso berezia, ez oso kutsakorra, ezta oso hilgarria ere", baina ezaugarri "oso negatiboa" du, "oso isila" delako eta "ezinezkoa baita nola eragingo duen aurreikustea", eta portaera "heterogeneoa" duenez, kutsatu batek beste batek baino "milioi bat aldiz handiagoa" izan dezake birus-karga.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu dira; beraz, agintariek emandakoei bakarrik egin kasu. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu COVID-19a ez hedatzeko modurik eraginkorrena eskuak sarri garbitzea dela. Ahoa estaltzeko maskarak derrigorrezkoak dira EAEn eta Nafarroan. Iparraldean, "espazio publiko itxietan" da derrigorrezkoa, baita Lapurdiko herri eta hiri nagusietan ere.
  • Bisitatuena

      Kargatzen ikusiena
      Kargatzen ikusiena