Zainketa Intentsiboetako oheen % 80 daude okupatuta EAEn

Zainketa Intentsiboetako Unitateetako oheen % 80,1 daude okupatuta egun Euskadin. Gainera, bertan ingresatutako pazienteen % 40,3k koronabirusa dute. Guztira, 332 ohe daude EAEko ZIUetan.

Gotzone Sagardui Eusko Jaurlaritzako Osasun sailburuak Eusko Legebiltzarrean azaldu duenez, 560 pertsona daude koronabirusarekin EAEko ospitaletako geletan, eta beste 134 ZIUetan.

Hori horrela, ZIUen kontingentzia planeko hirugarren fasean dago egun EAE (bostetik).

Hirugarren fase hori aktibatzeko, ZIUetako oheen % 20-35 egon behar dira koronabirus pazienteekin okupatuta. Hurrengo fasera pasatzeko, portzentajea % 50ekoa izan behar da, eta % 50etik gorakoa azkena martxan jartzeko.