Publizitatea
Itxi

2021/02/19

15:17

Gizartea

KORONABIRUSA

Beheranzko joera moteldu egin da eta R0k apur bat gora egin du

N.B. | EITB MEDIA

Positibo berriak eta positibotasun tasa apur bat jaitsi dira, bai eta gela arruntetan ospitaleratutakoen kopurua ere, baina ez gaixo larrien kopurua, 156 pazientera igo baita berriro.

  • Osasun langilea PCR proba bat egiten

    Osasun langilea PCR proba bat egiten. Argazkia: EFE.

  • Whatsapp
  • Whatsapp
  • Telegram
  • Bidali

Covid-19aren pandemia hobekuntza-eremutik urrun egonkortu da Euskadin. EAEn, positibo berriak 505era jaitsi dira azken orduetan, egun bat lehenago baino 58 gutxiago; hala ere, oinarrizko ugalketa-kopuruak, gaixo batek zenbat pertsona infektatu ditzakeen adierazten duenak, gora egiten jarraitzen du eta 0,82an dago.

Gipuzkoak bilakaera okerragoa izan du oinarrizko ugalketa-kopuruan, 0,70etik 0,78ra igaro baita, eta hobea Araban, 0,81etik 0,75era jaitsi baita. Bizkaian, beheranzko aldaketa txikiagoa izan da: 0,87tik 0,86ra.

Euskadik 100.000 biztanleko 14 eguneko intzidentzia-tasa metatua (385,14) murrizten jarraitzen du. Ospitaleetako zainketa intentsiboetako unitateetan, berriz, hiru paziente gehiago daude, eta 156 dira, baina gela arruntetan ospitaleratutako pertsonen kopurua 391ra jaitsi da.

Osasun Sailaren azken buletin epidemiologikoaren arabera, joan den egunean, 10.234 test diagnostiko egin zituzten, eta 67 positibo Araban, 284 Bizkaian, 149 Gipuzkoan atzeman zituzten.

Positiboen tasa % 4,9koa da, asteazkenean baino hamarren bat gutxiago. 100.000 biztanleko 14 egunetan metatutako tasa, bestalde, 20 puntu baino gehiago jaitsi da eta 385,14an kokatu da; hain zuzen ere, urtarrilaren 15eko tasa bera. Bizkaia da pilatutako tasaren 400 kasuak gainditzen dituen lurralde bakarra.

Ospitaleetan 54 ospitaleratze berri izan dira azken egunean (asteazkenean baino bederatzi gutxiago), eta, ondorioz, 391 gaixo daude gela arruntetan (22 gutxiago). Hala ere, zainketa intentsiboetako unitateetan dauden pazienteak 156ra igo dira, aurreko egunean baino hiru gehiago.

Gune gorrian dauden 5.000 biztanletik gorako euskal udalerriak bederatzitik zazpira jaitsi dira, eta bat ere ez dago Araban. Bizkaian, zazpi dira eragin handia izan duten herriak: Berango, Bermeo, Derio, Getxo, Gueñes, Santurtzi eta Sopela; eta Gipuzkoan, bi, Bergaran izandako hobekuntzaren ondoren: Elgoibar eta Oñati.

Hiriburuetako egoerak hobera egiten jarraitzen du; izan ere, Donostiak 300 baino gutxiago ditu (292,2), eta Gasteizek 400 baino gutxiago (378,9). Bilbok hobekuntza arinagoa izan du: 100.000 biztanleko 486,3 kasu izatetik 475,3 izatera igaro da.

Bestalde, Bilboko Jesuiten Ikastetxeko lau ikasgela konfinatuta daude koronabirus kasu positiboak atzeman ostean, Hezkuntza Sailak Europa Press albiste-agentziari jakinarazi dionez.

Oraingoz, ez dute jakinarazi zenbat positibo eman diren ikastetxean, bakarrik lau gela konfinatuta daudela.

Foru Erkidegoko egoera

Nafarroan 65 kasu positibo berri atzeman zituzten atzo, Nafarroako Osasun Publikoaren eta Lan Osasunaren Institutuak emandako datuen arabera, osasun sistema publikoan 1.793 proba egin ostean (893 PCR proba eta 900 antigeno test). Positibotasun tasa % 3,6koa izan zen.

Kontuan izan osasun agintariek koronabirusaren aurrean eman dituzten aholkuak. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu covid-19a ez hedatzeko modurik eraginkorrena musukoa erabiltzea, espazioak aireztatzea, segurtasun-distantzia gordetzea eta eskuak sarri garbitzea dela.
  • Bisitatuena

      Kargatzen ikusiena
      Kargatzen ikusiena