Publizitatea
Itxi

2021/03/17

13:11

Gizartea

KORONABIRUSA

Urkulluk tentsioari eusteko deia egin du, "atzera-bueltarik ez izateko"

N. B. | EITB MEDIA

Lehendakariak ohartarazi duenez, olatu berri bati aurre egiteko, zainketa intentsiboetako unitateetan aurrekoetan baino "tentsio handiagoa" izango litzateke.

  • Urkullu LABIren bilera baten atarian

    Urkullu LABIren bilera baten atarian. Artxiboko argazkia: EFE.

  • Whatsapp
  • Whatsapp
  • Bidali

Iñigo Urkullu lehendakariak "tentsioari" eusteko deia egin du, covid-19aren aurkako prebentzio-neurriak betetzeari dagokionez, "atzera-bueltarik" egon ez dadin eta pandemiaren olatu berri bat gertatuz gero "bizitzak salbatu" ahal izan izateko. Gainera, ohartarazi duenez, Euskadin zainketa intentsiboetako unitateetan aurrekoetan baino "tentsio handiagoa" egongo litzateke balizko olatu berri bati aurre egiteko.

Diario.es atarian argitaratutako artikulu batean, Urkulluk honako hau adierazi du: "Olatuen irudiak, fenomeno iraunkor gisa, batzuetan lasaiagoa eta besteetan bortitzagoa eta erresakak izateko arriskua duena, ezin hobeto sinbolizatzen du koronabirusaren pandemiaren mehatxu iraunkorra".

Covid-19aren lehen olatuaren ostean, bigarrena hiru tontorrekin iritsi zela gogoratu ondoren, "arreta eta zorroztasun osoz jokatzen jarraitzeko" eskatu du. "Egoerak hobera egin du, baina ziurgabetasuna mantentzen da. Iragarpena zalantzazkoa da, eta zaila da datozen hilabete, aste eta egunetan agertokia zein izango den aurreratzea", esan du.

Lehendakariak ohartarazi duenez, ezerk ez du ziurtatzen kutsadura-kurbak igoera berririk izango ez duenik, eta, "olatuak bata bestearen atzetik izan direla ikusita, egia bakarra da guztion esku dagoela hori saihesteko erabakiak hartzea".

Lehendakariaren ustez, datorren hilabetea, joan den astetik apirileko bigarren hamabostaldira arte, "erabakigarria izango da". "Zorroztasuna eta konpromisoa dira pandemiaren aurkako estrategia eraginkorrena", azpimarratu du.

Ziurgabetasunak eta ziurtasunak

Urkulluk "ziurgabetasuna elikatzen duten" faktoreak aipatu ditu, hala nola aldaera berrien hedapena, AstraZenecaren txertoaren inguruko zalantza zientifikoak, beheranzko joeraren geldialdia, inguruko herrialdeetako joeraren gorakada, eta "erlaxazio sozialak izan dezakeen eragin negatiboa".

Kontrapuntu gisa, "itxaropen handiagoko etorkizuna" zabaltzen duten "ziurtasunak" daudela uste du, txertoa jartzea eta bereziki ahulak diren kolektiboen immunizazioan aurrera egitea, besteak beste. "Une honetan, osasun eta gizarte zerbitzuetako langileekin batera ospitaleratutako pertsonak ia erabat immunizatuta daude", gogorarazi du.

Nolanahi ere, "egoeraren larritasunak bere horretan jarraitzen du, ez bakarrik detektatutako kasu positiboen beherakadaren geldialdiagatik, baita osasun-sistema aurreko olatuetan baino tentsionatuago dagoelako ere". Horrekin batera, "gaixotasun baten aurkako eguneroko borrokak sortzen duen nekea gero eta handiagoa da", gaineratu du.

  • Bisitatuena

      Kargatzen ikusiena
      Kargatzen ikusiena
    ;