Publizitatea
Itxi

2021/03/24

11:57

Gizartea

Koronabirusa

Aste Santurako neurriak gogortzea eztabaidatuko dute arratsaldean erkidegoek

E. G. | EITB MEDIA

Jaiegunetarako gutxieneko neurri komunak adostu bazituzten ere, kutsatzeen igoera tarteko, ez dute baztertu are gehiago zorroztea.

  • Bi turista Bilboko Guggenheim Museoan.

    Espainiako Gobernuak eta erkidegoek Aste Santurako neurriak gogortzea eztabaidatuko dute. EFE

  • Whatsapp
  • Whatsapp
  • Telegram
  • Bidali

Egunetik egunera, gorantz doaz positibo berrien datuak Espainiako Estatuan. Ingurumaria horretan, bilera dute gaur arratsaldean Espainiako Gobernuak eta erkidegoek, eta egoera epidemiologikoa gehiago kaskartu ez dadin Aste Santurako neurriak gogortzea edukiko dute mahai gainean.

Duela 15 egun, jaiegunetarako gutxieneko neurri komunak adostu zituen Lurraldeen arteko Osasun Batzordeak. Dena dela, Sanchezen gobernuak ez du baztertu neurriok are gehiago zorroztea. Hala ohartarazi zuen astelehenean bertan Carolina Darias Osasun ministroak. 

Izan ere, joera aldaketa sumatu dute kutsatzeen arloan, San Jose zubiaren ondorioak ikusteke ditugula. Bestalde, Europako herrialde batzuek konfinamendu zorrotzak iragarri dituzte Pazko Asterako.

Martxoaren 10ean adostutako neurriak honakoak dira: erkidegoen itxiera perimetrala, etxeratze agindua gehienez 23:00etan ezartzea, bilkura sozialak 4-6 pertsonara murriztea eta espazio pribatuan bizikideak ez diren lagunen arteko bilkurak debekatzea. Nolanahi ere, neurriok "minimoen itun" bat zirela azpimarratu zuen Dariasek, erantsiz erkidegoek "are neurri zorrotzagoak" ezartzea bazutela (Jaurlaritzarenak murriztaileagoak dira, esaterako).

Neurrien aferaz gain, polemika iturri izan den nazioarteko bidaien gaia izango dute hizpide Espainiako Gobernuak eta erkidegoek. Izan ere, kontraesan handia sortu da Estatu barruko erkidegoen arteko mugikortasuna debekatuta dagoen arren, atzerrira bidaiatzea badagoelako, eta hala, turistak gurera ere etor daitezkeelako. 

Kontuan izan osasun agintariek koronabirusaren aurrean eman dituzten aholkuak. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu covid-19a ez hedatzeko modurik eraginkorrena musukoa erabiltzea, espazioak aireztatzea, segurtasun-distantzia gordetzea eta eskuak sarri garbitzea dela.
  • Bisitatuena

      Kargatzen ikusiena
      Kargatzen ikusiena