Gizartea -

KORONABIRUSA

Pfizerren eta Modernaren milioi bat dosi iritsiko dira gaur Espainiako Estatura

80 urtetik gorako guztiek lehen dosia hartuta izan dezakete 15 egunean. Bestalde, gaur hasi dira EAEko presoak txertatzen.

Adineko pertsonak txertoa jasotzeko ilaran, Tuteran. Argazkia: Nafarroako Foruzaingoa
Adineko pertsonak txertoa jasotzeko ilaran, Tuteran.
Hainbat alorretako profesionalak Illunbeko zezen plazan izan dira txertoa hartzen

1:23

EIDER JAUREGI OIARTZABAL | EITB MEDIA

Whatsapp Facebook Twitter Telegram Email

Astelehenetik, martxoaren 29tik, aurrera, bultzada berri bat eman nahi zaio txertaketari Espainiako Estatu osoan. Carolina Darias Osasun ministroak iragarri duenez, Pfizer-BioNTechen eta Modernaren milioi bat dosi banatuko dituzte lehen aldiz autonomia erkidegoen artean. Orain arte Pfizerren 350.000 dosi inguru banatu dituzte astean.

TVEn egindako elkarrizketa batean azaldu duenez, 80 urtetik gorako pertsonak "bi aste barru" txertatuta izatea espero dute. Hain zuzen ere, Nafarroako Gobernuak jakinarazi du asteburu honetan Iruñeko eta eskualdeko 80 urtetik gorako pertsonak txertatzen jarraitu dutela UPNAko frontoian, eta 1.190 pertsona txertatu dituztela. Martxoaren 30etik (asteartea) apirilaren 2ra (ostirala), beste 2.700 laguni jarriko diete txertoa zentro horretan.

Txertaketa prozesuak agenda hau izango du: astelehena, martxoaren 29a, Elizondo (Baztan pilotalekua) eta Zangotza (frontoia); asteartea, hilaren 30a, Lesaka (Kultur Etxea) eta Tafalla (Kultur Etxea); asteazkena, hilaren 31, Carcastillo (kiroldegia), Irurtzun (kiroldegia) eta Azkoien (Kultur Etxea); osteguna, apirilaren 1a, Zangotza (frontoia); eta ostirala, apirilaren 2a, Altsasu. Guztira 4.428 pertsona txertatuko dituzte.

Tuterako osasun-barrutiari dagokionez, Ablitas, Arguedas, Buñuel, Cabanillas, Cadreita, Cascante, Castejon, Cintruenigo, Corella, Cortes, Fitero, Fustiñana, Milagro, Monteagudo, Murchante, Ribaforada, Valtierra eta Villafrancan bizi diren 80tik gorako 846 pertsonak asteazkenean txertatuko dituzte.

Lizarrako osasun-barrutian, berriz, martxoaren 30 eta 31rako antolatu da 80 urtetik gorakoen txertaketa Allon (udaletxea), Antzinen (frontoia), Lodosan (Kultur Etxea), Los Arcosen (Kultur Etxea), San Adrianen (Gazteriaren Etxea), Vianan (kiroldegia), Villatuertan (kiroldegia), eta Lizarran (musika eskola). 1.374 pertsona txertatuko dituzte bertan, aurreikuspenen arabera.

Jaso dituen 125.645 dosietatik 112.266 jarri ditu orain arte Nafarroako Gobernuak, eta dagoeneko 36.476 lagunek dute jarrita pauta osoa (bi dosiak).

Presoen txertaketa hasi da EAEn

Euskal Autonomia Erkidegoari dagokionez, Osakidetza igande honetan hasi da lurraldeko hiru espetxeetan dauden presoak txertatzen. Hala, 585 txerto jarri dituzte Zaballan, 192 Martutenen eta 137 Basaurin, Denis Itxaso Espainiako Gobernuak EAEn duen ordezkariak Twitterren duen profilean azaldu duenez:

Astelehenetik aurrera, 80 urtetik gorakoen kolektiboarekin jarraituko du Osakidetzak (150.000 pertsona inguru), eta, horiekin batera, 65 urtetik beherako herritarrak sartuko dira txertaketa kanpainan. Gotzone Sagardui Osasun sailburuak asteartean jakinarazi zuenez, AstraZenecaren formula erabiliko dute horretarako, eta prozesua immunizatu gabe geratzen diren funtsezko langileen txertaketarekin batera egingo da.

Txertoen etorrera hirukoiztu egingo da apiriletik aurrera

"Apiriletik aurrera asko handituko da txertoen etorrera, ia hirukoiztu egingo da txertoen kopurua", iragarri du Dariasek; izan ere, Pfizer, Moderna eta AstraZeneca etxeen dosiei, laugarren txerto bat gehituko zaie, Janssenena (dosi bakarrekoa). Apirilaren bigarren hamabostaldian iritsiko da.

Aurreikuspenen arabera, txerto horren 300.000 dosi inguru iritsiko dira apirilean, 1,3 milioi maiatzean eta 3,9 milioi ekainean. "Hau da, hiruhileko batean Janssenekin bakarrik bost milioi eta erdi espainiar txertatuko genituzke", azpimarratu du Dariasek.

Hau zure interesekoa bada, baliteke beste gai hauek ere izatea
Nafarroa Tutera berriak Euskal Autonomia Erkidegoa Espainia Gaixotasunak argazkiak Gizartea Eguneko albisteak Tafalla bideoak Albisteak Osasun albisteak Botikak albisteak Txertoak Koronabirusa