Publizitatea
Itxi

2021/03/29

22:28

Gizartea

KORONABIRUSA

Osakidetza, CureVac txertoaren saiakuntzarako lehen zentro erreklutatzailea

N.B. | EITB MEDIA

Nazioarteko proba klinikoan aurreikusitako parte-hartzaile kopurua lortu dute, prestakinaren eraginkortasuna eta segurtasuna frogatzeko. 2.000 pertsonak baino gehiagok parte hartzen dute EAEn.

  • Curevac txertoaren saiakuntza

    Curevac txertoaren saiakuntza. Argazkia: EFE.

  • Whatsapp
  • Whatsapp
  • Telegram
  • Bidali

Osakidetza Europa osoko parte-hartzaileen lehen zentro erreklutatzailea da CureVac farmazialari alemaniarrak covidaren aurka prestatutako txertoa probatzeko.

Gotzone Sagardui Eusko Jaurlaritzako Osasun sailburua astelehen honetan bildu da Luis Castaño eta Julio Arrizabalaga Biocruces Bizkaia eta Biodonostiako zuzendari zientifikoekin, hurrenez hurren, bai eta txertoaren azterketan buru diren ikertzaileekin ere.

Bileran, Osakidetzako osasun-ikerketako institutuetan egiten ari diren saiakuntzaren xehetasunak zehaztu dituzte; izan ere, prestakinaren eraginkortasuna eta segurtasuna frogatzeko nazioarteko saiakuntza klinikoan aurreikusitako parte-hartzaileen kopurua lortu dute.

Entsegua otsailaren 8an hasi zen Euskadin, eta ez du arazorik izan 2.000 parte-hartzaileen helburua lortzeko, batez ere herritarren "eskuzabaltasunari" esker, Osasun Sailak jakitera eman duenez. 

Izan ere, Osakidetza Europako lehen zentro erreklutatzailea bihurtu da bere osasun-ikerketako institutuen lanari esker, eta Euskadik Espainian hautatu diren hiru zentroetatik bi ematen ditu (hirugarrena Madrilgo Erkidegokoa da).

CureVacen entsegua saiakera kliniko handia da, eta 30.000 boluntariok baino gehiagok parte hartzen dute mundu osoan.

Euskadin, 18 urtetik gorako 2.000 pertsona baino gehiago ari dira parte hartzen. Taldeak modu aleatorioan banatu dituzte: txertoa jasotzen duen talde bat eta plazebo bat ematen zaion beste bat.

Parte-hartzaileak eta datuak biltzeaz eta jarraipenaz arduratzen diren profesionalek ez dute ezagutzen subjektu bakoitzaren taldea.

Saiakuntzak txertoaren bi dosi behar ditu, 28 eguneko tartearekin. Txertaketa otsailaren 8an hasi zenez, bigarren dosia martxoaren 8an hasi zen ematen.

Parte-hartzaileek urtebetera arteko jarraipena jasoko dute mediku-bisitekin eta telefono-deiekin, baita informazioaren erregistroa erraztuko duen aplikazio mugikor baterako sarbidea ere.

Hiru eta sei hilabeteren buruan, tarteko analisiak egingo dizkiete, eta, emaitzen arabera, txertoaren erabileraren onarpena bizkortu dezakete, dagoeneko merkaturatuta daudenetako batzuekin gertatu den bezala.

Euskadik nazioarteko saiakuntza kliniko horretan parte hartzeak euskal osasun-sistemaren gaitasuna islatzen du, bai asistentziala bai ikerketakoa, Eusko Jaurlaritzaren esanetan.

Azterlan horrek bat egiten du Euskal Osasun Sistema pandemia honetan garatzen ari den ikerketa-jarduerarekin, eta "aukera bikaina da covid-19aren aurkako txerto berri bat garatzen laguntzeko, beharrezkoa baita krisia maila globalean kontrolatzeko".

Kontuan izan osasun agintariek koronabirusaren aurrean eman dituzten aholkuak. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu covid-19a ez hedatzeko modurik eraginkorrena musukoa erabiltzea, espazioak aireztatzea, segurtasun-distantzia gordetzea eta eskuak sarri garbitzea dela.
  • Bisitatuena

      Kargatzen ikusiena
      Kargatzen ikusiena
    ;