Gizartea -
Operazioa, zabalik
Beste sei pertsona, bost adingabe, auzipetu dituzte Kopako finalaren istiluengatik
Aurrez, lau pertsona atxilotu zituzten Ertzaintzak eta Bilboko Udaltzaingoak. Bilboko Herritarren Segurtasunerako zinegotziak zehaztu duenez, gainera, "operazioa zabalik dago".
E. G. | EITB MEDIA
Amaia Arregi Bilboko Udaleko Herritarren Segurtasunerako zinegotziak jakinarazi duenez, beste sei pertsona, tartean bost adingabe, auzipetu dituzte joan den apirilaren 3an, Errege Kopako finalaren egunean Bilbon izandako istiluengatik.
Aurrez, lau pertsona atxilotu zituzten Ertzaintzak eta Bilboko Udaltzaingoak arrazoi beragatik. Zinegotziaren hitzetan, "Udaltzaingoak bost lagun auzipetu ditu, eta Ertzaintzak bestea. Dena den, ikerketa zabalik dago oraindik".
Arregik eta Josu Zubiaga Eusko Jaurlaritzako Segurtasun sailburuordeak 2020ko delituen balantzea egiteko Ertzaintzaren eta Udaltzaingoaren Batzordea zuzendu dute. Bertan, biharko, Errege Koparen finalerako, prestatu duten dispositiboaz mintzatu dira.
