Gizartea -
Euskal Herriko Unibertsitatea
EHUn sartzeko proben emaitzak ekainaren 16an jakinaraziko dituzte
Ikasleek ostegun honetan egin dituzte unibertsitatean sartzeko azken azterketak, eta EHUk datorren asteazkenean iragarriko ditu notak.
EITB MEDIA
Gaur amaitu dira Euskal Herriko Unibertsitatean (EHU) sartzeko probak eta ikasleei datorren asteazkenean jakinaraziko dizkiete emaitzak.
Guztira, Batxilergoko eta Lanbide Heziketako 12.782 ikasle matrikulatu ziren unibertsitatean sartzeko azterketak egiteko. Aurten, inoiz baino gune gehiago izan dira probak egiteko: EHUren ohiko zentroez gain, Barakaldoko BECen, Irungo Ficoban eta Gasteizko Iradier Arenan burutu dituzte azterketak.
Halaber, aurreko kurtsoetako 626 ikaslek eman zuten izena ikasgai konkretuetan nota igotzeko asmoz.
EHUk jakinarazi du emaitzak datorren asteazkenean –ekainaren 16an- argitaratuko dituela bere webgunean, 12:00etatik aurrera.
