Gizartea -
Koronabirusa
Zallako hezkuntza-zentro batean baheketa egiten ari da Osakidetza
Astelehenean, udalerria koronabiruseko semaforoaren eremu gorrira bueltatu da; Gotzone Sagardui sailburuaren esanetan, "segur aski", zentro horretan atzemandako positiboengatik gertatu da.
EITB MEDIA | AGENTZIAK
Osakidetza baheketa egiten ari da Zallako hezkuntza-zentro batean; izan ere, azken astean 13 positibo atzeman dituzte udalerrian, eta, halaber, astelehen honetan Zalla koronabirusaren semaforoaren eremu gorrira itzuli da, intzidentzia-tasa metatua 400 kasuetatik gora kokatu baita berriro.
Gobernu Kontseiluaren ostean egindako prentsaurrekoan, Gotzone Sagardui Osasun sailburuak onartu du udalerrian izandako kutsatzeen gorakada, "segur aski", baheketa egiten ari diren zentroan atzemandako positiboekin lotuta dagoela; hortaz, baheketa hori egiteko erabakia hartu dute, "komenigarritzat" jo baitute.
Sagarduik ez du beste xehetasunik eman, baina azaldu du ez dagoela ebidentziarik ondorioztatzeko Indiako aldaerak eragin duenik kasuen gorakada. Sailburuaren esanetan, baheketaren probak sekuentziatu arte itxaron beharko da, positiboek aldaera horrekin harremanik duten ala ez zehazteko.
Horrez gain, Sagarudik adierazi du orain arte Euskadin covid-19aren Indiako aldaeraren 36 kasu atzeman dituztela; hortaz, "bilakaera ez da kezkagarria izan", horren arabera.
