Eskubaloiko talde batean sexu-jazarpena jasan zuela kontatu du Reyes Carrerek

Gaztetan, eskubaloiko talde bateko presidentearengandik sexu-jazarpena jasan zuela kontatu du gaur Reyes Carrere Donostiako EH Bilduren ordezkariak.

Udaletxeko osoko bilkura batean jakinarazi du 20 urterekin, eskubaloian jokatzen zuenean, sexu-jazarpena pairatu zuela. Sexu-gehiegikeriak prebenitzeko eta identifikatzeko Donostiako klubei eta kirol elkarteei zuzendutako protokoloaz eztabaidatzen ari zienean eman du gertakariaren berri.

Carrere eskubaloiko jokalaria eta entrenatzailea izan zen. Protokolo horren beharraz ohartarazteko asmoz, bere bizpena kontatzea erabaki du ezustean.

Gertakariak 20 urte zituenean jazo ziren, orduan jokatzen zuen eskubaloiko taldearen bidaia batean. Klubeko presidentea hoteleko bere gelan sartzen saiatu zen, gaueko 23:30 inguruan.

"Klubeko presidentea ate joka etorri zen. Berak sartzen uzteko esaten zidan, eta nik ezetz erantzuten nion", adierazi du.

"Egiari zor, orduan ez nuen pentsatu ni jazartzen ari zenik, baina urteak pasatu zirenean ohartu nintzen jazarpena izan zela, eta hori da, hain zuzen ere, identifikatu behar dena", azpimarratu du.

Carrerek ez du argitu erasotzailea nor izan zen, ezta kluba zein zen ere.