Publizitatea
Itxi

2021/07/21

12:20

Gizartea

KORONABIRUSA

Hirugarren egunez jarraian, gora egin dute kutsatzeek Nafarroan

Eider Garaikoetxea O. | EITB MEDIA

459 positibo berri atzeman dituzte, bezperan baino 20 gehiago. Gauerditik indarrean daude kanpoaldean 10 pertsona baino gehiago biltzeko debekua eta herri bazkariak, kalejirak eta entzierroak galarazten duena.

  • Nafarroako Ospitale Guneko Larrialdiak.

    Nafarroako Ospitale Guneko Larrialdiak. Argazkia: EFE

  • Whatsapp
  • Whatsapp
  • Bidali

Nafarroak hiru egun daramatza jarraian kutsatzeen gorakadarekin. Joera horri jarraikiz, 459 positibo atzeman dituzte astearte honetan, Foru Gobernuak emandako datuen arabera.

Atzokoan 3.077 proba diagnostiko egin zituzten, eta horietatik % 14,9 positibo izan ziren.

Bezperan baino 20 gehiago dira, baina duela astebete baino gutxiago (orduko hartan 532 izan ziren, atzo baino 73 gehiago). Duela 14 eguneko datuei erreparatuta, ordea, nabarmen gutxiago zenbatu ziren (333; hots, 126 gutxiago).

Tuteran atzeman dituzte positibo gehien: 24. Gertu ditu, dena den, Iruñeko Arrotxapea auzoko 21 kasuak. Lizarran 17 izan dira; Barañainen, 16, eta Iruñeko Txantrea eta Iturrama auzoetan, 15na.

Datu txarroi aurrea hartu nahi die Chiviteren gobernuak, eta gauerditik indarrean daude murrizketa berriak. Hori horrela, debekatuta dago kanpoaldean 10 pertsona baino gehiago biltzea, eta galarazita, era berean, herri bazkariak, kalejirak eta entzierroak egitea. Nafarroako Gobernuak etxeratze agindua ere ezarri nahi zuen, baina ez du epaileen babesa lortu neurri hori indarrean jartzeko.

Nafarroako erietxeei dagokienez, 69 pertsona daude ingresatuta (aurreko egunean baino 10 gehiago) eta horietatik 12 ZIUn daude (bi gehiago). Zorionez, azken 24 orduetan ez da inor hil, eta pandemia hasi zenetik hildakoen kopurua ez da handitu (1.193).

Astearte honetan 6.489 pertsona txertatu dituzte, eta guztira, 361.324 nafarrek dute koronabirusaren kontrako immunizazio osoa.

Kontuan izan osasun agintariek koronabirusaren aurrean eman dituzten aholkuak. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu covid-19a ez hedatzeko modurik eraginkorrena musukoa erabiltzea, espazioak aireztatzea, segurtasun-distantzia gordetzea eta eskuak sarri garbitzea dela.
  • Bisitatuena

      Kargatzen ikusiena
      Kargatzen ikusiena
    ;