Gizartea -
Indarkeria matxista
Aurretik salaketak zituen gizon batek bere emaztea hil du Katalunian
Antza denez, gizonak ahozko abusuak egiteagatik salaketak zituen aurretik, eta bere buruaz beste egin du emaztea hil ostean. Bikotearen alabak ere erredura arinak zituen eta Generalitatearen esku geratu da.
Agentziak | EITB Media
Gizon batek ustez emaztea hil du, aurreko apirilean ahozko indarkeriagatik salaketa jarri eta dibortzio tramiteetan zegoena. Ondoren, erasotzaileak bere buruaz beste egin du Sant Vicenç de Castelleten (Bartzelona).
Esquadra Mossoen arabera, emakumearen gorpua 03:00ak aldera aurkitu dute erabat kiskalita, Sant Vicenç de Castellet eta El Pont de Vilomara (Bartzelona) lotzen dituen errepidean, sastraka artean. Sute txiki bat zegoela jakinarazi dietelako bertaratu dira agenteak.
Kiskalitako emakumearen hilotzetik metro gutxira, agenteek ibilgailu bat aurkitu dute, barruan hildako gizon batekin. Ustez, bere buruaz beste egin du, segurtasun-uhalarekin itota.
Bi urteko bikotearen alaba ere ibilgailuaren barruan zegoen, eta erredura txikiak zituen. Medikuek artatu ostean, Generalitateko Haurrak eta Nerabeak Zaintzeko Zuzendaritza Nagusiaren (DGAIA) ardurapean geratu da, senideren batek haren ardura hartu ahal duen arte.
Bikotea Terrassan bizi zen, Bartzelonan, eta Kataluniako Justizia Auzitegi Nagusiaren arabera, emakumearen aurkako indarkeriaren epaitegiak prozedura bat irekita zuen, emakumeak senarraren aurka jarritako salaketa baten ondorioz. Gainera, bikotea dibortziatzeko prozedura zibila izapidetzen ari zen.
Zortzigarren biktima Katalunian 2021ean
Terrassako Udalaren arabera, hildako gizona eta emakumea herri horretako bizilagunak ziren; hori dela eta, Udalak minutu bateko isilunea deitu du gaur eguerdian, ustezko krimen matxista gaitzesteko. Tània Verge Berdintasun eta Feminismo kontseilaria ere bertan izan da.
Katalunian izan diren azken hilketa matxistak "drama soziala" direla salatu du Vergek, eta horrelako gertakariak "onartezinak" direla salatu du "gizarte demokratiko batean".
Sant Vicençen kasua krimen matxista dela baieztatzen bada, Kataluniako zortzigarren biktima izango litzateke 2021ean.
Bestalde, Jordi Ballart Terrassako alkateak "amorrua eta samina" agertu du ustezko krimen matxistagatik, eta "matxismoa eta ildo bereko krimen nazkagarri horiek" gaitzetsi ditu.
Sant Vicenç de Castelleteko Udalak ere "atsekabea" agertu du eta ustezko indarkeria matxista kasu hori gaitzetsi du.
