34 urteko gizonezko mutrikuar baten gorpua topatu dute Saturrarango uretan

Larrialdi Zerbitzuek gizon baten hilotza berreskuratu dute Saturrarango hondartzan, Mutrikun, ur gainean, hareatzatik metro gutxira. Gorpua identifikatu dute dagoeneko, 34 urteko mutrikuar bat da hildakoa. 

Itsasoko Gurutze Gorriak eta Ertzaintzaren Zaintza eta Erreskate Unitateak hartu dute parte erreskatean eta bertaratutako osasun-langileek heriotza baieztatu besterik ezin izan dute egin.

Lekuko batek eman du abisua, 08:30ak aldera, Saturrarango hondartzatik berrogeita hamar bat metrora pertsona baten gorpua zirudiena ur gainean zegoela. Berehala bertaratu dira Gurutze Gorriaren ontzi bat, Ertzaintzaren Zaintza eta Erreskate talde bat eta Osakidetzako anbulantzia bat, eta gizonezkoa hilik zegoela egiaztatu besterik ezin izan dute egin. Gorpua berreskuratu ondoren, hareatzaren gainean utzi dute, epaileak gorpua jasotzeko agindu zain.

Ertzaintzak ikerketa abiatu du gertakaria argitzeko.