Itxi

2021/09/21

12:45

Gizartea

Koronabirusa

Covid-19a hirugarren heriotza arrazoia izan da EAEn lehen hiruhilekoan

O.P. | EiTB Media

Urteko lehen hiruhilekoan 5.590 pertsona hil dira EAEn, iaz baino % 8,2 gutxiago. Lehenengo heriotza-kausa tumoreak izan dira, eta, ondoren, zirkulazio-gaixotasunak. Covid-19a izan da hirugarren arrazoia, 811 heriotza eragin baititu lehen hiruhilekoan.

  • Erietxe bateko ZIUa. EFE

    Erietxe bateko ZIUa. EFE

  • Whatsapp
  • Whatsapp
  • Telegram
  • Bidali

Urteko lehen hiruhilekoan, 5.590 lagun hil dira Euskal Autonomia Erkidegoan, eta horietatik 811 covid-19ak eragindakoak izan ziren, heriotzen % 13,5. Hirugarren heriotza arrazoia izan da, tumoreen (1.472) eta zirkulazio-gaixotasunen (1.462) atzetik, Eustat Euskal Estatistika Agentziak gaur argitaratutako datuen arabera. 

Covid-19ak eragindako 811 heriotza horietako 785 kasutan frogatutzat jo dute covid-19aren ondoriozkoak izan direla, eta 26 kasutan covid-19a balizko eragilea izan da. Gainera, beste 62 heriotzatan covid-19a heriotza kausa ziurtatuen artean egon da, baina funtsezko arrazoia izan gabe.

Datuak lurraldez lurralde aztertuta, hildakoen kopururik handiena Bizkaian zenbatu dute (476), Gipuzkoan (225) eta Araban (110) baino hildako gehiago zenbatu baitituzte bertan. Hiriburuetako datuei dagokienez, Bilbo nabarmendu da, koronabirusak 199 heriotza eragin baititu Bizkaiko hiriburuan; ondoren, Gasteiz dator, 88 heriotzarekin; eta azkenik, Donostia, 64rekin. Halaber, aipatzekoak dira Getxoko datua (38) eta Barakaldokoa (29).

Gizonen heriotzen kopurua (444) emakumeena (367) baino handiagoa izan da; adinen arabera, berriz, eragin handiena jasan duten taldeak 80 urtetik gorakoak izan dira (548), eta, ondoren, 60-79 urtekoen taldea (236).

Covid-19ak eragindako heriotza gehienak EAEko ospitaleetan gertatu dira, % 83rekin (2020ko lehen hiruhilekoan % 81,4); ondoren, egoitza soziosanitarioetan, % 8,8rekin (iaz % 11); etxeetan, % 7,6rekin (iaz % 7,6); eta beste leku batzuetan, % 0,6rekin (iaz % 0).

Heriotza kopurua jaitsi egin da iaztik

Euskal Autonomia Erkidegoan (EAE) 5.990 pertsona hil dira 2021eko lehen hiruhilekoan, hau da, iazko epealdi berean baino % 8,2 gutxiago. Aurreko urteetako datuekin alderatuz gero, 2020an, 2018an eta 2010-2019 epealdiko batez bestekoan baino heriotza gutxiago izan dira aurtengo martxoan. Sexuen arabera, 3.010 gizon eta 2.980 emakume hil dira, hots, % 7,2 eta % 9,1 gutxiago, hurrenez hurren, Eustat euskal estatistika erakundearen datuen arabera.

Hiru lurraldeetan egin du behera heriotza-kopuruak, eta bereziki aipagarria izan da Araban izandako jaitsiera, % 21,3koa izan baita (761 heriotza gutxiago); Bizkaian % 8,5 gutxitu dira heriotzak (3.277 hildako); eta Gipuzkoan, % 1,2 (1.952).

Urteko lehenengo hiruhilekoan izandako heriotzen artean, hamar hildako urtebetetik beherakoak izan dira (% 0,2), eta 97 heriotza ehun urtetik gorakoenak (% 1,7).

Heriotza kausa nagusiak tumoreak eta zirkulazio sistemako gaixotasunak izan dira, 1.472 eta 1.462 heriotza eragin baitituzte, hurrenez hurren; bien artean heriotzen % 49 izan dira. Hirugarren heriotza kausa covid-19a izan da, 811 kasurekin (% 13,5). Arnas arrazoiengatiko heriotzak laugarren heriotza kausa izan dira, 319 heriotzarekin (% 5,3). Nerbio sistemako gaixotasunek eragindako heriotzak 311 izan dira (% 5,2), eta digestio sistemako gaixotasunek eragindakoak 255 (% 4,3).

Heriotzen kausak desberdinak izan dira sexuaren arabera: gizonezkoen artean, tumoreak hilgarriago gertatu dira zirkulazio aparatuko gaixotasunak baino; emakumezkoen artean, berriz, heriotza kausa nagusia zirkulazio aparatuko gaixotasunak izan dira, eta tumoreak bigarren.

EAEko hazkunde begetatiboa negatiboa izan da 2021eko lehen hiruhilekoan, 2.692 pertsona gutxiagorekin. Hiru lurraldeetan galdu da biztanlerik: Bizkaian 1.665 pertsona, Gipuzkoan 819 eta Araban 208.

  • Bisitatuena

      Kargatzen ikusiena
      Kargatzen ikusiena
    ;