Gizartea -
Ikus-entzunezko Legea
Netflix bezalako plataformek ez dituzte euren edukien % 6 euskaraz, gazteleraz edo galegoz eskaini beharko
Netflix, HBO Max, Disney+ eta Prime Video plataformek, besteak beste, ez dute baldintza hori bete beharko, egoitza soziala Espainiatik kanpo dutelako. ERCk iragarri du zuzenketak aurkeztuko dituela Ikus-entzunezko Lege-proiektua hobetzeko.
AGENTZIAK | EITB MEDIA
Espainiako Aurrekontu Orokorrak adosteko negoziazioaren baitan, Esquerrak (ERC) eta Espainiako Gobernuak Ikus-entzunezko Legean aldaketa bat egitea hitzartu zuten, streaming bidezko plataformek euren edukien % 6 euskaraz, katalanez edo galegoz eman ditzaten.
Ministroen Kontseiluak gaur onartu du lege-proiektua, eta, Europa Press agentziak aurreratu duenez, Netflix, HBO Max, Disney+ eta Prime Video nazioarteko plataformek, besteak beste, ez dute baldintza hori bete beharko, egoitza soziala Espainiatik kanpo dutelako.
Beste era batera esanda, Espainiako Estatuko streaming bidezko plataformei soilik eragingo die neurri horrek.
ERCk dagoeneko iragarri du lege-proiektua Kongresuan tramitatzen denean hainbat zuzenketa aurkeztuko dituztela egitasmoa hobetzeko, eta, besteak beste, aipatu plataformak euren edukien % 6 euskaraz, katalanez edo galegoz eskaintzera derrigortzeko.
