Itxi

2021/12/06

14:05

Gizartea

KORONABIRUSA

Gaiztotu egin da egoera EAEn: intzidentzia 724 kasukoa da eta 70 gaixo daude ZIUetan

Eider Garaikoetxea O. | EITB MEDIA

Gainera, 19 pertsona hil dira covid-19ak jota azken astean. Ospitaleetako gela arruntetan duela lau egun baino 59 pertsona gehiago daude. Gipuzkoa dago okerren, 1.100 kasu metatuko langa igaro baitu.

  • Donostiako Ospitaleko ZIU unitatea.

    Donostiako Ospitaleko ZIU unitatea. Argazkia: EITB Media

  • Whatsapp
  • Whatsapp
  • Telegram
  • Bidali

Are gehiago gaiztotu da egoera epidemiologikoa Euskal Autonomia Erkidegoan (EAE). Azken 14 egunetan pilatutako intzidentzia 724 kasukoa da 100.000 biztanleko. Horrez gain, positiboen igoeraren presioa (9.608 kasu azken zenbaketaren, azaroaren 29tik abenduaren 5era arte egindakoaren, arabera) ospitaleetan igartzen hasi da: dagoeneko 266 pertsona daude erietxeetako gela arruntetan, eta 70 larri, ZIUn, Eusko Jaurlaritzako Osasun Sailak gaur kaleratu duen buletin epidemiologikoaren arabera.

Adierazle ia guztiek egin dute okerrera, R0 indizeak salbu. Azken hori hiru ehunen jaitsi da: 1,26tik 1,23ra jaitsita. Dena dela, 1etik gorakoa izaten jarraitzen du (beraz, positibo batek pertsona bat baino gehiago kutsatzen du). Hazkunde nabarmenenak intzidentzian, aurreko buletinean baino 150 puntu gorago, eta ZIUetan (+15) sumatu dira. Zaintza intentsiboko unitateetako gaixoen kopuruak 10 egun daramatza hazten, etenik gabe. 

Covid-19ak hildako pertsonen kopuruan ere datu kaskarra utzi du astelehen honek: 19 pertsona zendu dira birusarekin, duela astebete baino bat gehiago. Iraila amaieratik zenbatutako daturik altuena da.

Esan bezala, birusaren eragin metatuak hazten jarraitzen du, eta 724 kasukoa da gaur-gaurkoz. Lurraldeka, Gipuzkoa da zigortuena, 100.000 biztanleko 1.117 kasu pilatu ditu azken 14 egunetan. Araban, 707 kasukoa da, eta Bizkaian, 432. Joan den ostegunetik, Gipuzkoan hazi da gehien intzidentzia (+311), atzetik Araba duela (+283). Bizkaian ere igo da (+123), baina ez horrenbeste. Bitxia bada ere, Gipuzkoak du R0 indize txikiena (zenbat pertsona kutsatzen dituen positibo batek), 1,19, eta ondoren datoz Bizkaia (1,28) eta Araba (1,29).

Kutsatzeei dagokienez (guztira, 9.608), egun guztietan egon dira milakotik gora. Joan den asteazkenean zenbatu zituzten gehien, ia 1.700 kasu berri. Positibotasun tasa ere % 10eko langatik gora dago, eta igande honetan % 13,6koa izan da.

Adin tarteka, 0-9 urtekoak dira birusak gehien erasandakoak: intzidentzia metatua 1.343 kasuko da 100.000 umeko. Azken lau egunetan ia 300 puntu igo da pilatutako tasa hori. Gainerakoan, 40-49 urtekoek 918ko tasa dute, eta 10-19 urteko nerabeek, 915 kasukoa.

Zehatz begiratuta, txerto pediatrikoaren zain dauden 6-12 urtekoen artean, 2.000 gorakoa da birusaren eragina Are, igande honetan atzemandako 1.113 kasuetatik 219 talde honi dagozkio.

Agian zure interesekoa da: Positiboak, herriz herri

Udalerriei erreparatuta, gorria da nagusi EAEn eta ez dago 5.000 biztanle baino gehiagoko herririk transmisio altuko gunetik kanpo. Horietan guztietan erabaki beharko dute osasun-arloko prebentzio-neurriak mantendu ezin diren jarduerekin aurrera jarraituko duten edo bertan behera utziko dituzten.

Kezkagarria da Azpeitian (Gipuzkoa) pilatutako tasa, ia 3.000 puntu harrapatu baititu, edota Andoain, Arrasate, Eibar, Eskoriatza, Hernani, Lazkao, Urretxu, eta Zumarragakoak ere, denetan 1.500 kasu baino gehiago metatu baitituzte.

Kontuan izan osasun agintariek koronabirusaren aurrean eman dituzten aholkuak. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu covid-19a ez hedatzeko modurik eraginkorrena musukoa erabiltzea, espazioak aireztatzea, segurtasun-distantzia gordetzea eta eskuak sarri garbitzea dela.
  • Bisitatuena

      Kargatzen ikusiena
      Kargatzen ikusiena
    ;