Itxi

Gizartea

KORONABIRUSA

Urkullu Erregeen kabalgatei buruz: "Alkate bakoitzak bere udalerriaren egoera ezagutzen du"

AGENTZIAK | EITB MEDIA

Lehendakariak esan du neurri berriek ez dietela kabalgatei eragiten, baina ohartarazi du udal arduradunek badakitela euren udalerria arriskuan dagoen ala ez.

  • Olentzeroren desfilea joan den abenduaren 24an Gasteizen

    Olentzeroren desfilea joan den abenduaren 24an Gasteizen. Argazkia: EFE.

Iñigo Urkullu lehendakariak argitu du LABIk covid-19aren hedapena saihesteko astearte honetan hartutako neurri berriek ez dutela eraginik Erregeen kabalgatetan, baina ohartarazi du udal-arduradunek badakitela beren udalerria arrisku-egoeran dagoen ala ez, "zer egin dezakeen edo ez erabakitzeko, edo egitea gomendagarria dena". "Uste dut Euskadin argazkia nahikoa esanguratsua dela edozein arduradun instituzionalentzat", berretsi du.

Urkullu Euskadiko Babes Zibileko Planaren Aholku Batzordeko (LABI) buru izan da, eta koronabirusak sortutako egoerari aurre egiteko neurri berriak hartu ditu.

Neurri horiek Erregeen kabalgatei eragiten ote dieten galdetuta, lehendakariak esan du Eusko Jaurlaritzak Gabonen aurreko desfileei buruzko gomendioak eman zituela, eta, horren ondorioz, udalerri batzuek Olentzeroren desfileak bertan behera utzi zituztela, nahiz eta beste batzuetan egin ziren.

Halaber, zehaztu duenez, kabalgatak ez daude aurreikusita hartutako neurri berrietan, ez baitira esparru itxi batean egiten, eta ezin baita neurtu desfilera joaten diren pertsonen kopurua, ibilbide bat baitute.

Euskadik covid-19aren kutsatzeen errekor berria lortu zuen astelehenean, 6.568 positibo detektatuta, eta 100.000 biztanleko 14 eguneko intzidentzia-tasa metatua 2.285 kasuko da jada.

Kontuan izan osasun agintariek koronabirusaren aurrean eman dituzten aholkuak. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu covid-19a ez hedatzeko modurik eraginkorrena musukoa erabiltzea, espazioak aireztatzea, segurtasun-distantzia gordetzea eta eskuak sarri garbitzea dela.
  • Bisitatuena

      Kargatzen ikusiena
      Kargatzen ikusiena