Gizartea -
Iragarpena
Astea eguzkitsu hasiko den arren, bihar euria eta hotza itzuliko dira
Asteartean, tenperatura minimoak ez dira 10 gradura iritsiko, eta 5 gradu ingurukoak izango dira barrualdean.
eitb media
Astea eguzkitsu hasi dugu, baina aldaketa etorriko da bihar bertan, prezipitazioek eta ipar-haizeak tenperaturak jaistea ekarriko baitute, Euskalmeten iragarpenaren arabera.
Aurreko astekoarekin alderatuta, gaur ez da aldaketa handirik espero eta giroa eguzkitsua izango da. Zeruan goi-hodeiak agertuko dira eta baliteke tarteka zerua lausotuta egotea. Hego-haizea indartuz joango da, eta bolada gogorrak izango dira arratsalde-gau partean. Tenperaturak berdintsu jarraituko du; maximoak gradu pare bat jaitsiko dira, baina udaberri itxurako giroak jarraituko du kostaldean, momentuz.
Bihar, ordea, eguraldia aldatu egingo da. Goizean, goi-hodei batzuk agertuko dira, hego-haizea nagusituko da eta giroa epela izango da oraindik. Eguerdi aldera, haizea ipar-mendebaldera aldatuz joango da, kostaldetik hasita, eta hodeiak ugaritu egingo dira. Arratsalde-gau partean, goibel egongo da, euritara joko du eta tenperatura nabarmen jaitsiko da. Egunaren amaieran, elur-kota 1.500 metrotik behera koka daiteke, eta iparraldean ekaitzak jo lezake, haize-bolada gogorrekin kostaldean.
Asteazkenetik aurrera, tenperaturak behera egiten jarraituko du, ipar-mendebaldeko haizearekin, eta prezipitazioak ere espero dira. Ostegunean atertu egingo du, baina ostiralean berriro egingo du euria.
Kontsulta ezazu eguraldiaren iragarpena, eta bidali zure argazkiak.