Itxi

Gizartea

Koronabirusa

Frantziako Asanblada Nazionalak txertoa inposatu du bizitza sozialerako eta bidaiatzeko

agentziak | erredakzioa

Aurreko osasun ziurtagiria (txertoak edo proba negatiboa) ordezkatuko du lege berriak, eta aurrerantzean hiru dosi hartzea edo gaixotasuna gainditu eta bi ziztada hartzea eskatuko dute.

  • Covid-19 ziurtagiria Iparraldean. Argazkia: EITB

    Covid-19 ziurtagiria Iparraldean. Argazkia: EITB

Frantziako Asanblada Nazionalak txertaketa ziurtagiria onartu du gaur, eta horrek murrizketa handiak ezarriko dizkie covid-19aren aurka immunizatu nahi ez duten pertsonei. Txertoari uko egin dioten bost milioi pertsonak txertatzera bultzatzea da arauaren helburuetako bat.

Aldeko 215 boto, kontrako 58 eta 7 abstentzio jaso ditu arauak, eta horrela, legearen izapideak amaitu dituzte, Emmanuel Macron presidenteak txertatu ez direnak "izorratu" nahi zituela esateagatik giroa berotu ostean.

Aurreko osasun ziurtagiria (txertoak edo proba negatiboa) ordezkatuko du lege berriak, eta aurrerantzean hiru dosi hartzea edo gaixotasuna gainditu eta bi ziztada hartzea eskatuko dute.

Egunero 300.000 pertsona inguru kutsatzen ari da omikronekin Frantziako Estatuan, eta txertatu gabeak dira larri gaixotzen direnen gehiengo zabala. Horregatik, legea lehenbailehen jarri nahi du indarrean Gobernuak, olatua euste aldera.

Neurriak

Kultur ekitaldietara joateko (zinemak, antzokiak, museoak…) derrigorrezkoa izango da hiru dosiko ibilbide osoa betea izatea, azken sei hilabeteetan gaixotasuna gainditu eta bi dosi jasotzea, edo txertorik ez jasotzeko mediku salbuespena edukitzea.

Baldintza berbera bete beharko da merkataritza gune handietan, kafetegietan, tabernetan, jatetxeetan edo kirol aretoetan sartzeko, eta baita ibilbide ertain eta luzeko garraio publikorako ere.

Txertaketa ziurtagiri faltsuekin harrapatzen dituztenentzako zigorrak handitu egingo dituzte, eta gehienez 5 urteko espetxe-zigorra eta 75.000 euroko isuna jasoko dute gezurrezko agiri ugari dituztenek.

Hala eta guztiz ere, "amnistia" moduko bat aurreikusten da pertsona horientzat 30 eguneko epean txertoa hartzen badute.

16 urtetik gorakoei bakarrik ezarriko zaie lege berria. 12 eta 15 urte artekoek nahikoa izango dute lehengo ziurtagiriaren baldintzekin.

5 eta 11 urte arteko adingabeei dagokienez, gurasoen artean desadostasunen bat balego txertaketaren inguruan, baten nahia nahikoa izango da haurra immunizatzeko.

Orain arte, osasun ziurtagiriak aurreikusten zuen, txertaketaz gain, nahikoa zela test negatibo bat erakustea, baina aukera hori bertan behera geratu da.

Kontuan izan osasun agintariek koronabirusaren aurrean eman dituzten aholkuak. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu covid-19a ez hedatzeko modurik eraginkorrena musukoa erabiltzea, espazioak aireztatzea, segurtasun-distantzia gordetzea eta eskuak sarri garbitzea dela.
  • Bisitatuena

      Kargatzen ikusiena
      Kargatzen ikusiena