Itxi

Gizartea

iragarpena

Abisu horia larunbatean Hego Euskal Herrian tenperatura altuengatik

I.G. | eitb media

Larunbatean eta igande goizean 30 graduren bueltan izango dira termometroak kostaldean. Araba eta Gipuzkoa barnealdean tenperaturak 34 gradu ingurura igoko dira baina, bereziki Nafarroako Erriberan, 40rainokoak izan daitezke.

  • Gazte batzuk Arga ibaian Iruñea parean

    Gazte batzuk Arga ibaian Iruñea parean. Artxiboko argazkia: EFE

Asteburuan aire bero masa handi batek termometroak igoaraziko ditu 30 graduraino kostaldean, 34raino EAEko barnealdean eta 38-40 graduren bueltan izateraino Nafarroako Erriberan. Sargori sentsazioa handia izango da, erdi-mailako hodeiak eta goi-hodeiak nagusituko dira, eta kalima pixka bat ere espero da. Eguraldia oso antzekoa izango da bai larunbatean, baita igandean ere. Alabaina igande arratsaldean aldatzen hastea espero da.

Hori dela eta, Eusko Jaurlaritzako Segurtasun Sailak abisu horia aktibatuko du larunbat eguerdietan tenperatura "oso altuengatik"; izan ere, maximoak 35 gradu ingurukoak izan daitezke Bizkaia eta Gipuzkoa barnealdean, 34 gradukoak Araban eta 27 gradukoak kostaldean, Euskalmet Euskal Meteorologia Agentziaren arabera.

Abisu horia 14:00etatik 19:00etara egongo da indarrean, bero gehien espero den eguraldiarekin bat eginez. Egunaren azken orduetan haizeak ipar-ekialdera egin lezake bat-batean, bolada gogorrekin eta oso gogorrekin, eta ez da baztertzen zaparrada trumoitsuren bat botatzea.

Igandean tenperatura beroak mantenduko dira. Goizalde epel baten ondoren, zenbait puntutan 20 gradu inguruko minimoekin, maximoak 30 gradutik gorako balioetan mugituko dira berriro. Zerua berriro uherra egongo da kalimagatik eta erdi mailako hodeiekin eta goi-hodeiekin.

Hala ere, arratsaldetik aurrera itsasotik datozen haize freskoak sartzen hasiko dira. Gainera, baliteke zaparradak eta ekaitza izatea egunaren amaieran.

Estatuko Meteorologia Agentziak (Aemet) bere webgunean jakinarazi duenez, abisu horia larunbat osoan egongo da indarrean Nafarroan.

Astelehenetik aurrera, 20 gradutik behera egotea espero da.

  • Bisitatuena

      Kargatzen ikusiena
      Kargatzen ikusiena