Beasaingo jaietan emakume batek pairatutako bortxaketa ikertzen ari dira

Emakume bat bortxatu dute igande goizaldean Beasainen, herri horretan ospatzen ari diren Loinatz jaietan, Zaldizurrieta plaza inguruan. Zumarragako Ospitalean artatu dute emakumea.

Beasaingo Udalak bozeramaileen-batzordea deitu du 12:00etarako eta bertan adierazpena adostu dute, biktimari eta senideei elkartasuna adierazteko. Oharrean zehaztu duenez, erasoa argitzea Ertzaintzaren eta zerbitzu medikuen esku dago, eta, beraz, ikerketapean dago gertatutakoa.

Era berean, Beasaingo Udalak sexu-erasoak erabat gaitzesten dituela berretsi du eta gogoratu du helburu horrekin, protokoloa aktibatu zutela festen atarian. "Sexu-erasoak pertsonen askatasunaren kontrako eraso zuzenak dira, pertsonen duintasunaren aurkakoak eta onartezinak. Bereziki emakumeei egindakoak. Jaiak libre eta seguru bizi behar dira", gehitu du Udalak oharrean.

Goierriko Itaia taldeak deituta elkarretaratzea egin dute igande arratsaldean, 19:30ean, Beasaingo Bideluze plazan, "Indarkeria matxista orori aurre egin" lelopean.