Itxi

Gizartea

Suteak Frantzian

Frantziak azken 20 urteetako baso-suteen olaturik larriena bizi du

AGENTZIAK | EITB MEDIA

Girondako suteak ez du aurrerapen "esanguratsurik" izan ostegunetik ostiralerako gauean. Agintarien esanetan, 7.400 hektarea erre dira azken egunotan.

  • Sutea Girondan

    Sutea Girondan. Argazkia: EFE.

Europar Batasuneko Koperniko Programaren arabera, uda honetan Frantzia suntsitzen ari den sute-olatua herrialdeak azken 20 urteetan ikusi duen txarrena da, Atmosferako Kontrol Zerbitzuek hartutako satelite bidezko irudien arabera.

Programak bere webgunean ohartarazten duenez, "azken 20 urteetako datu multzoaren urte desberdinetako alderaketak erakusten du 2022ko ekainaren hasieratik balio nabarmen altuagoak eman direla Frantzia, Espainia eta Portugalen", bereziki "uztaileko eta abuztuko bero boladetan".

Mark Parrington Atmosferako Kontrol Zerbitzuko arduradun nagusiaren arabera, suteen hedapenak ez du konparaziorik 2003tik.

"Suteek eragindako arrisku larriaren indizeek esan nahi dute suteen eskala eta intentsitatea hazi egin dela, eta horrek eragina duela airearen kalitatean", gaineratu du.

Oraingoz, eta tokian tokiko egoerari dagokionez, Frantziako Gironda departamenduan asteartean piztu zen suteak ez du aurrerapen "esanguratsurik" izan ostegunetik ostiralerako gauean, nahiz eta agintariek esan duten dagoeneko 7.400 hektarea erre direla.

Akitania Berriko Prefeturak ohar baten bidez gaur ohartarazi duenez, oraindik ere sugarrak hedatzeko "arrisku oso larria" dago, tenperatura altuak eta lurraren lehortasuna direla eta. 1.100 bat kidek parte hartzen dute sua itzaltzeko lanetan, eta horiei Europako hainbat herrialdetako taldeak ere gehitu zaizkie.

Rennesetik mendebaldera dagoen Broceliande basoan gauean izandako beste sute batek 230 hektarea landaretza eta Suediatik datozen bi ur-ponpa suntsitu ditu, Rennes Morbihan prefekturak Le Figarok jasotako ohar batean iragarri duenez.

Beste bi baso-sutek 660 hektarea inguru jan dituzte asteartetik, Jura hegoaldean; izan ere, fokuetako baten progresioa ordu gutxi barru kontrola liteke, beste sutea kontrolpean dagoen bitartean.

  • Bisitatuena

      Kargatzen ikusiena
      Kargatzen ikusiena