Iñaxi Lasa 98 urteko tiktoker ezagunak etxean ez gelditzeko deia egin die adineko pertsonei

Adinekoen eguna ate joka dugun honetan, Iñaxi Lasa, 98 urteko goierritarrak argi utzi du, beste behin, adinak ez duela mugarik. Tik Tok sare sozialean ia egunero partekatzen ditu bere 100.000 jarraitzaile baino gehiagorekin bideoak, eta ez nolanahikoak, gainera, baina bada gai bat bereziki atsegin duena eta jarraitzaileak txundituta uzten dituena: kirolarekiko duen zaletasuna.

Ikusmenarekin arazoak medio, 2018ko urrian, 94 urterekin, gimnasioan hasi zen kirol errutinekin. Muskuluak lantzeko pisuak altxatzen ditu, eta arraun-makinan aurrera eta atzera aritzen da. "Mesede egiten dit eta distraitu egiten naiz, denbora errazago pasatzen da", aitortu du Lasak. Bizitzeko gogo itzela du Iñaxik.

2020an igo zituen lehen bideoak Tik Tok sare sozialera semeak animaturik, eta, orduz geroztik, bere umorea eta alaitasuna mundu osora zabaltzen dihardu. Dagoeneko 100.000 jarraitzaile baino gehiago ditu.

Dantza egiten ere ikusi izan dugu maiz Iñaxi bere bideoetan. "Garai batean asko gustatzen zitzaidan erromerietan ibiltzea", kontatu du. Orain, baina, mugitzeko arazoak ditu, baina horrek ez du atzera botatzen; izan ere, kementsu sentitzeko beste bideetako bat horixe da hain justu, gorputza mugitzea. Bere bideoetan egin dituen dantza pausoak itsasoaren beste alderaino iritsi dira, bere jarraitzaileen artean, esaterako, Mexikoko jende asko baitago.

Lasak komunitate birtual osoa dibertitzen jarraitzeko asmoa du, baita kirola egiten jarraitzekoa ere. Horregatik, mundu guztia kirola egitera animatu du, eta bereziki, jende heldua. "Etxetik irteteko eta ibiltzeko esango nieke, etxean ez geratzeko", adierazi du.