Euskadik % 3 handitu du bere ekoizpen zientifikoa azken urtean

Euskadiko ekoizpen zientifikoa etengabe areagotzen ari da, eta azken urtean % 3ko hazkundea izan du, urteko 7.846 argitalpenera iritsi arte. 2021ean, ikerketa-ekoizpenaren % 6,4 izan da Estatu mailan. Era berean, lanen kalitatea nabarmentzen da, lehen kuartileko aldizkarietako argitalpenak (ospetsuenak) bikoiztu egin baitira azken hamarkadan. Halaber, lehen aldiz, ekoizpen zientifikoaren % 60 munduko lehen mailako aldizkarietan ekoitzi zen iaz.

Hala jaso du Zientzia Euskadin 2022ko txostenak, zeina gaur goizean aurkeztu duen Jokin Bildarratz Hezkuntza sailburuak, Adolfo Morais Unibertsitate eta Ikerketa sailburuordearekin eta Fernando Cossio Ikerbasqueko zuzendari zientifikoarekin batera.

Bestalde, nazioartean lan egiten duten Euskadiko ikertzaileak % 15 areagotu dira azken hamar urteetan: 2011n nazioarteko lankidetzarekin egindako argitalpenen % 40tik, 2021eko % 55era. Nazioarteko lankidetza horietan, Euskadiko ikertzaileek posizio garrantzitsua dute, eta, kasu askotan, argitalpenen egile nagusiak dira, txostenak nabarmentzen duenez.

I+G

Espainiako Estatistikako Institutu Nazionalaren 2020ko datuen arabera, Euskadi da I+Gko jardueretan gehien inbertitzen duen autonomia erkidegoa, Barne Produktu Gordinaren (BPG) % 2tik gorako inbertsioarekin. Bestalde, Eustatek argitaratutako azken datuek nabarmendu dutenez, aurreko urtean baino % 10 gehiago hazi da, eta 2021ean 1.645 milioi euroko maximo historikora iritsi da.

Horri esker, gaur egun 21.300 pertsona baino gehiago aritzen dira ikerketa lanetan Euskadin; hau da, 100 langiletik 2 I+Gko lanetan aritzen dira, eta autonomia erkidegoa da Estatuko liderra adierazle horretan.

Unibertsitateak, ekoizle handienak

Unibertsitateek EAEko ikerketa zientifikoen % 65 ekoizten dute, EHUk sustatuta, ia 4.500 argitalpen indexatu egin dituena 2021ean. Ondoren, osasun-sektorea, BERC eta CIC zentroak eta zentro teknologikoak daude.

Azken hamarkadan, Euskadik ikertzen dituen gai-arlo nagusiak mantendu dira; gehien argitaratzen den arloa Medikuntza da, ondoren Ingeniaritza, Materialen Zientziak, Fisika eta Astronomia eta Kimika. Gainera, azken 10 urteetan, Gizarte Zientzien eta Giza Zientzien produktibitateak hazkunde oso nabarmena izan du.