Zigarreta elektronikoak, tradizionalak bezain kaltegarri

Ameriketako Estatu Batuetan hiru ikerketa egin dituzte tabakoaren kontsumo tradizionalaren eta zigarro elektronikoen artean. Ondorio nagusia izan da biak direla osasunerako kaltegarriak; bihotzaren eta odol hodien funtzioan aldaketa kezkagarriak dituzte.

Wisconsineko Unibertsitateak egindako bi ikerketetan, zigarro tradizionalak, elektronikoak eta erretzen ez duten pertsonen datuak alderatzen dira. Bietan, honako profildun pertsona hauek hartu zuten parte: batez beste 4,1 urtez zigarro elektronikoak erabili izan zituzten 164k; batez beste 23 urtez batez beste zigarreta tradizionalak kontsumitu izan dituzten 117k; eta inoiz erre ez zuten 114k. Ikerketa horien ondorio harrigarriena erretzeak gazteengan duen eragina da; kontsumitzen denbora gutxiago badaramate ere, eraginak berdinak dira. 

Lehenengo analisian, presio arteriala, bihotz-maiztasuna edo besoaren arteria brakialaren diametroa ebaluatu zituzten. Ez erretzaileekin alderatuta, beste bi taldeen bihotz-maiztasuna handitu zen. Gainera, arteria-presio sistolikoaren eta diastolikoaren areagotze handiagoak antzeman zituzten, baita arteria brakialaren konstrikzio nabariagoa ere.

Matthew C. Tattersall ikerketaren egile nagusiak baieztatu zuenez, "zigarretak erre edo lurrundu eta berehala, aldaketak gertatu ziren presio arterialean, bihotz-maiztasunean, bihotz-maiztasunaren aldakortasunean eta odol-hodien tonuan (konstrikzioa)".

Bigarren ikerketan, boluntarioen errendimendua ikertu zen ahalegin-proba batean, eta emaitzek orain arte esandakoa berretsi zuten; ez erretzaileek aipatutako bi motetako erretzaileek baino emaitza hobeak lortu zituzten. Christina M. Hugheyk, WU Healtheko mediku kardiobaskularrak, laburbildu duenez, "zigarreta elektronikoak lurruntzen zituztenen errendimendua eta zigarro tradizionalak kontsumitzen zituztenena ez ziren oso desberdinak, erretzen ari zirenek baino urte gutxiagoz erre bazuten ere".

Bostongo Unibertsitateak egindako azterlanak kapsula edo zaporedun zigarro elektronikoen kontsumoa ikertu zuen. Emaitzek erakusten dutenez, horiek kontsumitzeak konposatu organiko lurrunkorren eraginpean jarri ditzake kontsumitzaileak, eta horiek osasun kardiobaskularrari eragin diezaiokete.

Gas horiek oso ohikoak dira garbiketa-produktuetan, horma-margoan, zigarretetan, ibilgailuen ihes-gasetan edo pestizidetan.

Azken ikerketan, 18 eta 45 urte bitarteko 106 helduk hartu zuten parte. Emaitzak beste biei gehitu zitzaizkien.