Gizartea -
''Bai bakarrik da bai'' legea
Bizkaiko Auzitegiak urte eta erdi murriztu du sexu erasotzaile baten aurkako zigorra, lege berria aplikatuta
"Bai bakarrik da bai" legea indarrean sartu zenetik Bizkaiko epaileek aztertzen duten lehen errekurtsoa da. Kondena-epaia berrikusteko eskatu zuen kondenatuak, Sexu Askatasunaren Berme Integralari buruzko Legea indarrean sartu ondoren.
EITB MEDIA | AGENTZIAK
Bizkaiko Probintzia Auzitegiak lau urte eta erditik hirura murriztu du sexu-erasotzaile baten aurkako zigorra, "Bai bakarrik da bai" legea aplikatuta. Organo judizial honen lehen ebazpen judiziala da, eta, horren bidez, horrelako kondena bat berrikusten da.
Hala, 2019ko ekainaren 10ean, gizon bati murriztu egin diote emakume bati sexu erasoa egiteagatik ezarri zitzaion zigorra. Kondenatuak berak eskatu zuen kondena epaia berrikusteko, Sexu Askatasunaren Berme Integralari buruzko Legea, "Bai bakarrik da bai" legea izenez ezagunagoa, indarrean sartu ondotik.
Bizkaiko Auzitegiak ebatzi du, arau hori aplikatuz, auzipetuak hiru urte bete behar zituela, hasiera batean ezarri zitzaion lau urte eta erdiko zigorra jaso beharrean. Hala, kondenatuak zigorra beteta izango luke.
Auzitegi Gorenak azaldu duenez, auzitegiek zigorra murriztu ahal izango diete sexu-delituengatik zigortutakoei, baina zehaztu du "kasuz kasu" egin beharko dela, "eta ez modu orokorrean".
Gorenak erabakia hartu aurretik, probintzia-auzitegi batzuk kondenatuei irizpiderik mesedegarriena aplikatzearen alde agertu ziren, zigorrak murriztuz, tartean, Bizkaian. Beste batzuk, Nafarroakoak eta Errioxakoak, kasu, zigorrak ez murriztea erabaki dute, baldin eta ezarritako zigorrak lege berriarekin ezarri ahal badira.
