Hotza, protagonista asteburuan

Asteburuan tenperaturak jaitsi egingo dira eta hotzak hartuko du protagonismoa. Larunbatean tenperatura nabarmen jaitsiko da, 0 gradura hurbilduz. Gainera, asteburuak aurrera egin ahala, termometroak jaisten jarraituko du.

Gaur, ostirala, euria izango da, batez ere eguerditik aurrera. Goizean, Kantauri isurialdeko zenbait lekutan euria egin dezake, baina arratsaldetik aurrera euria ugaritu egingo da ia leku guztietan. Iparraldean, tenperaturak ez dira asko aldatuko, baina hegoaldean pixka bat igo daitezke. Egunaren bigarren zatian, ipar edo ipar-ekialdeko haizea nabarmenduko da.

Bihar, larunbata, termometroek behera egingo dute eta, batez ere Kantauri isurialdeko zenbait lekutan, euria egingo du. Elur-maila 1.000 metroan izango da goizean zehar. Egunaren bigarren zatian ateri izango da. Tenperaturari dagokionez, maximoak 6-10 gradukoak izango dira goizeko lehen orduetan. Bestalde, minimoak egunaren bukaeran izango dira, eta mendi inguruetan edo hegoaldeko toki batzuetan izotz txikiak sor daitezke. Ipar haizeak joko du.

Igandean, giro hotzak jarraituko du, baina euria egiteko probabilitateak behera egingo du. Hala ere, kostaldetik gertu, Araba eta Nafarroa hegoaldean baliteke prezipitazioak izatea. Tenperaturek berdintsu jarraituko dute, eta goizean hodeitza zulatu daiteke. Gainera, goizaldean izotz txikia izan liteke hegoaldean.