Oiartzunen piztutako baso sutea amatatu dute

Sutea piztu da goizaldean Oiartzunen (Gipuzkoa), Pikogarate bideko baso eremu batean, Euskadiko suhiltzaileek Twitter bidez jakinarazi dutenez. Dena dela, goizean, 07:45 aldera, itzali dute bertaratu diren Gipuzkoako lau suhiltzaile kamioiek. 

Antza, sua furgoneta batean piztu da —ibilgailua guztiz kiskalita geratu da—, 05:30 aldera. Garrak arin zabaldu dira basora, landareria lehor dago eta. Aiako Harrirako bidea itxi dute, baina inguru horretako etxebizitzak ez dituzte hustu.  

Zorionez, ez da inor zauritu. 

Euskal Autonomia Erkidegoa abisu horian dago sute arriskuagatik.