Gizartea -
Astelehenetik aurrera
Air Europak bertan behera utzi ditu Bilbo eta Madril arteko gaurko hegaldi guztiak, pilotuen grebagatik
Maiatzaren 22, 23, 25, 26, 29 eta 30ean eta ekainaren 1 eta 2an izango dira greba-egunak. Kaltetutako bezeroei zenbait aukera eskaini dizkie Air Europak: hegaldi-txartelaren data edo helmuga aldatzea, edo dirua txartel batean jasotzea, etorkizunean gastatu ahal izateko.
AGENTZIAK | EITB MEDIA
Datorren ekainaren 2ra bitartean Air Europa konpainiako pilotuek deitutako grebagatik, gaurko aurreikusita zeuden 14 hegaldi bertan behera geratuko dira, tartean, Bilbotik Madrilerakoa eta Madrildik Bilborakoa.
Maiatzaren 22, 23, 25, 26, 29 eta 30ean eta ekainaren 1 eta 2an izango dira greba-egunak, eta zortzi egun horietan, guztira, 114 hegaldi geratuko dira bertan behera. Estatu mailan, esaterako, Madril eta Bilbo Coruña, Palma, Vigo eta Malagarekin lotzen dituzten hegaldiei eragingo die, eta nazioartean, Erroma, Milan, Paris-Orly, Porto eta Lisboa lotzen dituztenei.
Ikusi hemen bertan behera geratuko diren hegaldiak, egunez egun. Kaltetutako bezeroei hainbat aukera eskaini dizkie Air Europak: hegaldi-txartelaren data edo helmuga aldatzea, edo dirua txartel batean jasotzea, etorkizunean gastatu ahal izateko.
Aldarrikapenak
Seplaren iritziz, "Air Europako zuzendariek sortutako lan-tentsioaren eta gatazkaren ondorioz" deitu dute pilotuek grebara, "langileen eskubideekin jolasean ari direlako, proposamen gisa saltzen ari baitira IV. hitzarmen kolektiboan lortutako lan-eskubideen benetako galera dena".
"Enpresaren presioen aurrean men egiteak epe labur eta ertainerako lan-baldintza eta soldata kaxkarragoak ekarriko lituzke", ondorioztatu du sindikatuak. "Pilotuak diskriminatuta sentitzen dira, soldatak berrikusteko beste hitzarmen-negoziazioetan enpresak beste jarrera bat izan duelako", gaineratu du.