Gizartea -
ARABA
Bi gizon atxilotu dituzte Gasteizen Ertzaintzaren agente batzuk jotzea eta iraintzea egotzita
Gertakariak atzo jazo ziren, ertzainak lurrean etzanda zegoen gizon bat artatzera joan zirenean. Gizona agenteei oldartu zitzaien, baita berarekin zegoen lagun talde bat ere. Bi erasotzaile identifikatu eta atxilotu dituzte. ErNEk "eraso basatia" salatu eta auzian pertsonatuko dela iragarri du.
Agentziak | EITB Media
Ertzaintzak bi gizon atxilotu ditu Gasteizen Herritarren Babeserako patruila bateko agenteei eraso egitea leporatuta, Eusko Jaurlaritzako Segurtasun Sailak gaur jakinarazi duenez.
Iturrion arabera, gertakariak atzo arratsaldean jazo ziren Arabako hiriburuan. Bi agentek lurrean etzanda zegoen gizonezko bat ikusi zuten, eta arazoak zituelakoan laguntzera joan zirenean, gizasemea ertzainei oldartu zitzaien. Agintaritzaren kontrako atentatua egotzita, atxilotu egin zuten. Era berean, inguruan ziren beste gizonezko batzuek ere ertzainen kontra egin zuten. Ia gehienek ihes egitea lortu zuten.
Bi izan dira atxilotutakoak, hiru delitu egotzita (agintaritzaren kontrako atentatua, desobedientzia eta erresistentzia). Gainerako erasotzaileak identifikatu gabe ditu Ertzaintzak.
ErNE auzian pertsonatuko da, akusazio partikular gisa
ErNE sindikatuak atzoko "eraso basatia" salatu du eta, jipoitutako lankideekin batera, auzian akusazio partikular gisa pertsonatuko dela iragarri.
Ertzaintzaren sindikatuak ohar batean nabarmendu duenez, erasoa "istilu asko izan ohi diren gunean" gertatu zen, pertsona bat artatzera joandako bi agenteen kontra.
"Segurtasun Sailari zein alderdiei dagozkien legezko neurriak zein operatiboak" hartzeko deia egin die ErNEk, eta hori gorabehera, auzian pertsonatuko dela esan du.
Atxilotutakoak "berehala" kartzelara sartzeko eskatu du, "lehen neurri gisa". Zauritutako agenteei babesa helarazi die eta arin osatzeko opatu.