Gizartea -
trafikoa
Zirkulazioa bere onera etorri da Txorierrin, hainbat orduko kaosaren ostean
Bi kamioik talka egin dute 06:20 aldera Lezama parean, eta pilaketa luzeak izan dira Galdakaoko noranzkoan. Kamioilarietako bat zauritu da, eta ospitalera eraman dute.
eitb media
Txorierriko igarobidean (N-637) ohi bezalakoa da jada zirkulazioa, 10:45etik, amaitu dira-eta bi kamioiren arteko istripuak eragindako ilara luzeak.
Ezbeharra 06:20an izan da, Lezama parean eta Galdakaoko noranzkoan. Hasiera batean, errepidea guztiz itxi behar izan dute, eta ibilgailuak BI-737 errepidetik bideratu dituzte. Handik gutxira, 07:50 inguruan, erreietako bat zabaldu dute. Dena dela, horrek ez du saihestu pilaketak sortzea, eta 8 kilometrorainokoak izan dira.
Azkenean, 10:45 aldera, istripua izan duten bi ibilgailu astunak bidetik kendu dituzte garabiak erabiliz, eta errepidea garbitu dute langileek. Ordutik, ohikoa bezalakoa da ibilgailuen joan-etorria.
Istripuan kamioi gidarietako bat zauritu da, eta ospitalera eraman dute.
Ez da honakoa EAEko errepideetan gaur goizean gertatutako istripu bakarra. A-1ean, Armiñonen, hiru ibilgailuk ezbeharra izan dute, eta han ere pilaketak sortu dira. Bestalde, A-8an, Malmasin parean (Basauri) eta Donostiarako noranzkoan, kamioi bat matxuratu da, eta ilarak sortu dira.