Gutxienez 19 hegaldi gelditu dira bertan behera Loiun azken orduetan Europa erdialdeko elurtearen eraginez

Elurte itzela jasaten ari da Europa erdialdea, eta arazo asko ari da eragiten, besteak beste, aire-trafikoan. Izan ere, Municheko aireportuan ez ezik, Amsterdam eta Frankfurteko aireportuetan ere buruhauste handiak ari da sortzen elurra, eta dozenaka hegazkin gelditu dira aireratu gabe.

Ondorioz, aireportu horietatik Loiura iristekoak ziren edo Loiutik aireportu horietara joatekoak ziren 19 hegazkin lurrean gelditu dira. 

Atzo hasi ziren Loiun arazoak, elurra dela-eta Municheko aireportua itxi ondoren, eta gaur partzialki ireki badute ere, trafikoa ez da guztiz bere onera itzuli.