Gizartea -
Bilbo
Bost gizon atxilotu dituzte Athletic-Atletico Madril partidaren aurretik izandako istiluekin lotura dutelakoan
Gertakariak Bilboko taberna batean jazo ziren, Kopako finalaurrekoaren aurretik. Athleticen "jarraitzaile talde arriskutsu" batek Atletico Madrilen zale bat kolpatu zuen eta kalteak eragin zituen lokalean. Operazioa zabalik dago, eta ez dute baztertu atxiloketa gehiago egotea.
EITB Media
Ertzaintzak bost gizon atxilotu ditu Athleticen eta Atletico Madrilen arteko partida baten atarian izandako istiluekin harremana dutelakoan. Istiluok Bilboko taberna batean jazo ziren, otsailaren 29an, Errege Kopako finalerdikoaren itzuliko norgehiagokaren aurretik.
Segurtasun Sailak ohar baten bidez jakinarazi duenez, atxilotutakoek 23 eta 41 urte artean dituzte, eta "Athleticeko jarraitzaile talde arriskutsu" bateko kideak omen dira. Desordena publikoak, gorroto delitua, lesioak eta mehatxuak egitea eta tabernan kalteak egitea egotzi diete. Beste gizon bat ikerketapean jarri du Ertzaintzak.
Gertakariak San Mames estadiotik gertu dagoen ostalaritza establezimendu batean jazo ziren. Athleticeko jarraitzaileak talde madrildarraren zale batzuk zeuden tabernan sartu ziren, eta horietako bat jo zuten. Gainera, kalteak eragin zituzten tabernan.
Ertzaintzak zabalik du oraindik ikerketa, eta ez da baztertzen atxiloketa gehiago egitea.
Bost atxilotuak Bilboko ertzain-etxera eraman dituzte, Bilboko guardiako epaitegiaren esku utzi aurretik egin beharreko izapideak betetzera.