Hiru hegaldi bertan behera utzi eta beste bost desbideratu behar izan dituzte Loiun, haize zakarraren ondorioz

Arratsaldean Loiuko aireportuan lurreratzeko asmoa zuten bost hegaldi beste aerodromo batzuetara desbideratu behar izan dituzte haize zakarraren ondorioz, AENAko iturriek EFE albiste agentziari baieztatu diotenez. Gainera, Loiutik abiatu behar ziren hiru hegaldi bertan behera geratu dira.

Bartzelonatik zetorren hegaldi bat ezin izan da lurreratu, eta Bartzelonara itzuli da. Londresetik (Erresuma Batua) zetorren beste bat Bartzelonara desbideratu dute, eta Munichetik (Alemania) aireratu den batek Bruselan (Belgika) lur hartu behar izan du. Gainera, Tenerife iparraldetik zetorren hegaldi bat eta Eindhovenetik (Herbehereak) zetorren beste bat desbideratu dituzte.

Euskalmetek zehaztu duenez, asteazken honetan 140 km/h-ko ufadak izan dira Urduñan, 117 Garbean, 102 Langraizen, 89 Gasteizen eta 83 Arkautin.

Ostegunean ere, haizeagatik abisu horia 15:00etan hasiko da, eta gauerdian amaituko da, 100 km/h-ko abiadura gaindituko baitute haizeguneetan, batez ere mendebaldean, eta haizeguneak ez diren eremuetan 60-80 km/h-koak izan daitezke.

Ostegunean ere, nabigaziorako arriskuagatiko abisua indarrean egongo da egun osoan zehar eta itsasgorarekin bat egiten duen kostaldeko inpaktuagatik, 05:00etatik 07:00etara eta 17:00etatik 20:00etara.

Ostiralean ez da hain haize zakarra ibiliko, eta Segurtasun Sailak itsasaldeko arriskuagatik ezarritako bi abisu horiei bakarrik eutsiko die. Bata nabigaziorako, 00:00etatik 06:00etara, eta bestea kostaldeko inpaktuagatik (05:00-08:00)

Donostiako Pasealeku berria, itxita ibilgailuentzat

Hain justu, olatu handiengatik ezarritako abisua tarteko, Donostiako Udalak Babes Zibilak Pasealeku Berria itxiko die ibilgailuei. Bertan sartzeko debekua gaurko 14:00etatik ostiraleko 08:00ak arte egongo da indarrean, Sociedad Fotograficatik aurrera. 

Kontsulta ezazu eguraldiaren iragarpena, eta bidali zure argazkiak eta bideoak.