Tsarnaev anaiek atentatu suizida egin nahi zuten, uztailaren 4an

Tsarnaev anaiek, Bostongo maratoiaren atentatuaren egileek, uztailaren 4an, hau da, AEBetako independentziaren egunean, egin nahi zuten erasoa, baina plana aldatu zuten, lehergailuak uste baino lehenago amaitu zituztelako, herrialde horretako hedabideek jakinarazi dutenez.

Egun horretan, Bostonek herrialdeko ospakizun handienetako bat egiten du, milioi erdi pertsona elkartu ohi baitira, su-festa ikuskizun batean.

The New York Times egunkariaren arabera, Dzhokhar Tsarnaevek (19 urtekoa, atxilotuta eta ospitaleratuta dago) aitortu egin du uztailaren 4an atentatua egin nahi zutela. Gainera, eraso suizida egitea ere aztertzen ari zirela ere zehaztu ei du.

Azkenean, baina, lehergailuak uste baino azkarrago egin zituzten, eta Bostongo maratoian eztandaraztea erabaki zuten.

Hain zuzen ere, bi lapikotan sartu, eta helmugatik gertu zartarazi zituzten. Ondorioz, hiru pertsona hil, eta 280 zauritu zituzten.