Nelson Mandelari azken agurra emateko astea

Nelson Mandela Hegoafrikako presidente ohiari igandean emango diote azken agurra Qunun (Hegoafrikako hego-ekialdean), haurtzaroa igaro zuen herrian. Ordura arte, hainbat ekitaldi egingo dituzte Mandelaren omenez:

- Abenduak 10, asteartea

Elizkizun ofiziala egingo dute FNB Stadiumen, Soweton (Johannesburg), 2010. urteko munduko futbol txapelketako partida batzuk hartu zituen estadioan. 80.000 bat lagunek parte hartuko dute elizkizunean, tartean mundu osoko estatuburu eta gobernuburuek.

- Abenduak 11, 12 eta 13 (asteazkena, osteguna eta ostirala)

Mandelaren hil-kapera irekiko dute Pretorian, Union Buildings eraikinean. Akreditazioa lortzen duten herritarrei soilik utziko diete barrura sartzen. Kamerarik ez dute sartzen utziko. Presidente ohiaren hilkutxa egunero eramango dute ospitale militarretik bertara.

- Abenduak 14, larunbata

Mandelaren gorpua Qunura eramango dute. Aurretik, Afrikako Kongresu Nazionalak azken agurra emango dio presidente ohiari. Mthathatik Qunura 30 kilometroko ibilbidea egingo dute.

- Abenduak 15, igandea

Hileta ofiziala: Mandela Qunun ehortziko dute, presidente ohiak berak eskatuta.