Zortzi enpresa handik espioitza masiboa amaitzeko eskatu diote Obamari

Zortzi teknologia enpresa handik eskaera bat sinatu dute, Barack Obama Ameriketako Estatu Batuetako presidenteari eta Kongresuari zaintza sistema erreformatzea eskatzeko. AOL, Apple, Facebook, Google, LinkedIn, Microsoft, Twitter eta Yahoo enpresek sinatu dute Gobernuaren Zaintzaren Erreforma (Reform Government Surveillance) eskatzeko.

Akordio horren helburua Segurtasun Agentzia Nazionalaren (NSA) espioitza programa masiboen aurka modu argi eta formalean protesta egitea da. NSAk urteak daramatza horrelakoak egiten, eta azken hilabeteetan polemika handia sortu da, aipatutako konpainietako erabiltzaileen datuak atzeman dituela uste baitute.

Zaintza erreformatzeko, Gobernuak kontuan hartu beharko lituzkeen bost printzipio bildu ditu enpresa horien eskaerak: Gobernuak erabiltzaileen informazioa lortzeko duen boterea mugatzea; kontuak gainbegiratzea; Gobernuaren eskaeren aurrean gardenak izatea; informazio-fluxu askea errespetatzea; eta Gobernuen arteko liskarrak ekiditea.

Halaber, erabiltzaileen pribatutasunerako eskubideak zergatik babesten dituzten ere azaldu dute enpresa horiek guztiek, Applek izan ezik.