Mundua -
Presidentziarako hauteskundeak
Erdoganek irabazi ditu Turkiako Presidentziarako hauteskundeak
53 milioi turkiar deitu dituzte bozkatzera, baina partehartzea %74ean kokatu da, joan den martxoko hauteskundeetan lortutako % 89tik urrun.
Erredakzioa
Recep Tayyip Erdogan Turkiako lehen ministroak irabazi du Turkiako Presidentziarako hauteskundeen lehen itzulia. Bozken % 51,8 lortu du Erdoganek, beraz ez da bigarren itzulirik beharko.
Bere aurkaririk zuzenenak, Ekmeleddin Ihsanogluk, % 38,5eko portzentaia lortuko zukeen, eta Selahattin Demirtasek % 9,8a. Hauteskundeetarako prestatutako eskolak bertako 14:00etan itxi dituzte, EAEko 16:00etan, eta partehartzea nahiko baxua izan dela nabarmendu dute.
Datu horrek, antza, Erdoganen alde egiten du. 53 milioi turkiar zeuden bozkatzera deituak, baina, datu ofizialik ezean, partehartzea joan den martxoko %89koa bain ahulagoa izan daiteke.
'Adiskidetze aro berria'
Hauteskundeak irabazi ondoren egindako adierazpenetan, Erdoganek esan du "adiskidetze aro berria" bultzatuko duela Turkian.
"Hemen ez da galtzailerik izan. Galtzaile bakarra 'statu quo'-a izan da", adierazi du Ankaran.
"Adiskidetze aro berriari ekingo diot orain, Turkia Zaharraren liskar guztiak ahazteko helburuarekin", gaineratu du.
Bere alderdiko egoitzaren balkoitik egin du hitzaldia, behin hauteskunde batzordeak botoen ehuneko berrogeita hamar baino gehiago lortu duela baieztatu eta bigarren itzulirik ez dela behar jakinda.
Martxoan, % 89ko partehartzea
Egunean zehar lasaitasuna izan da nagusi. Hala ere, hautesle askok onartu dute ez dutela konfidantzarik botuen zenbaketan.
Gogoratu dutenez, martxoko udal hauteskundeen egunean argi mozketak izan ziren hainbat auzotan, eta, oposizioaren ustez, kalterik nabarmenena oposizioak indarra daukan auzoetan bizi izan zuten. Hori dela eta, Erdoganek “ahalik eta boto gehien lapurtu dezakeen beldurra” erakutsi dute.
