Ezbaian daudenak eta abstentzioa, giltzarri Greziako hauteskundeetan

Datorren igandean, hilaren 20an, Grezian izango diren hauteskundeak azken urteetako lehiatuenak izango dira, inkestek kontserbadoreen eta ezkerzaleen arteko berdinketa aurreikusi dute eta.

Azken galdeketek agerian utzi dute zaila dela igandean hauteskundeek utziko duten emaitza zein izango den jakitea, izan ere, zalantza gehiegi daude. Abstentzioa eta ezbaian dauden boto-emaileen kopurua dira horietako batzuk.

Inkesta gehienen arabera, boto-emaileen % 10-15ek oraindik ez dakite nori emango dioten botoa. Abstentzioari dagokionez, ez da ia daturik eman. Grezian botoa ematea derrigorrezkoa da, baina normalean ez da isunik jartzen legea urratzen bada. Aurreikuspenen arabera, urtarrileko hauteskundeetan eta erreskatearen inguruko erreferendumean baino jende gehiago geratuko da etxean.

Soziologoen hitzetan, abstentzio zabal batek Syrizari egingo lioke min gehien, Demokrazia Berriak duen boto tradizioa handiagoa delako.

Inkesten arabera, Syrizak urtarrilean bere alde egin zuten herritarren % 64ren babesa izango du; Demokrazia Berriak, berriz, % 84.

Urrezko Egunsentia alderdi neonazia, berriz, hirugarren indarra izango da, ia seguru, botoen % 6,2-6,7 artean eskuratuko baitu.

PASOKeko sozialdemokratek, KKEko komunistek eta To Potamiko zentristek ordezkaritza lortuko dute Parlamentuan; eserlekuen % 5 eta % 7 artean lortuko dituzte. Hortik aurrera, lausoagoak dira emaitzak. Syrizatik banatu direnek sortutako Herri Batasunak, baina, ordezkaritza lortuko omen du.

Botoen % 30

Greziak hauteskunde sistemak 50 eserleku gehiago ematen dizkio boto gehien jasotzen dituen alderdiari. Hori kontuan hartuta, lehen indarrak babesaren % 30 baino gehiago badu, bi alderdi txikirekin koalizioa osatu beharko du gobernatzeko. Hortik behera, alderdi askok osatutako koalizio batek emango dio soilik egonkortasuna Parlamentuari.