Siriak laguntza militarra eskatu dio Errusiari

Bachar al Assad Siriako presidenteak modu ofizialean laguntza militarra eskatu dio Errusiako Gobernuari, jihadismoari aurre egiteko, Serguei Ivanov Errusiako Presidentetzako administrazio buruak jakitera eman duenez.

Berehala etorri da Errusiaren baietza: Errusiako Senatuak, jada, aho batez onartu du Vladiimir Putin presidenteari Sirian  indar militarrak erabiltzeko baimena ematea.

Goi-ganbera errusiarrak onartutako ebazpenean, Sirian aireko indar militarrak, ez lurrekoak, erabiltzea ebatsi da, Ivanovek zehaztu duenez.

Siriako gerra hasi zenetik, Errusiako Gobernua izan da Al Assaden erregimenaren babesle nagusia. Azken asteotan, hainbat hedabidek zabaldu dutenez, nabarmen egin du gora Sirian soldadu errusiarren presentziak.

Errusiako Armadak base militarra du, aspalditik, Tartusen, Siriako kostaldean. Bi herrialdeon arteko defentsarako akordioen izenean, Kremlinek Siriara armak bidaltzen jarraituko duela iragarri du.