Hainbat manifestari Londresko udaletxean sartu dira

Joan den ekainaren 14an Londresko Grenfell dorrean izandako suteak haserrea eragin du biktimen senideen artean. Ezbeharrean 30 pertsona hil ziren.

Gaur, hainbat manifestarik protesta egin dute Kensington eta Chelseako udaletxearen aurrean eta horietako batzuk udaletxean sartu dira. Udalak behar bezala jokatu ez duela salatzen dute.

Biktimen senideak Udalarekin haserre daude. Diotenez, urteak eman dituzte eraikin horretan suteen kontrako neurriak jartzeko eskatzen, baina Udalak entzungorrarena egin die. Kiskalitako dorrean babes ofizialeko 120 etxebizitza zeuden eta kudeaketaren ardura Udalari zegokion.

Horrez gain, ezbeharretik bizirik atera diren lagunak behar bezala artatu ez izana egotzi diote Udalari.

BBC kateak zabaldutako irudietan ikus daitekeenez, hainbat manifestari udaletxeko eskaileran gora joan dira eta beste asko eraikinaren atarian geratu dira, oihuka.