Suediak ez du Assange atxilotzea eskatuko, bortxaketa bategatik ikertzen ari direlako

Suediako Justiziak baztertu egin du Fiskaltzaren eskaria eta, ondorioz, ez du Julian Assange atxilotzea aginduko, 2010ean gertatu zen bortxaketa baten kasuan ikertzen ari direlako.

Epaimahaiak azpimarratu duenez, WikiLeaks-eko sortzailearen atxiloketa eskatu gabe ere posible litzateke hura galdekatzea, aipatu kasuko epaileak hala galdeginez gero.

Auzia duela bi urte itxi zuten, baina Assangeren egoera aldatu egin denez –Ekuadorrek 2012an eman zion asilo diplomatikoa galdu du-, kasua berriro ireki dute.

Assange apirilean atxilotu zuten Ekuadorrek Londresen duen enbaxadan, Kitok asilo diplomatikoa kendu eta gero.

Egun, Erresuma Batuko espetxe batean dago preso. Londreseko auzitegi batek 50 asteko kartzela-zigorra ezarri zion, 2012ko baldintzapeko askatasuna urratzea egotzita.

Halaber, Ameriketako Estatu Batuek Assange estraditatzea eskatu zuten, WikiLeaks atarian informazio konfidentziala zabaldu izana leporatuta. Erresuma Batuko Justiziak erabaki behar du orain estradizio eskaera onartu ala ez.