Mundua -
AEB - IRAN
AEBk Irango Espazio Agentzia zigortu du
Gobernu estatubatuarrak esan du ez duela onartuko Teheranek programa espaziala misil balistikoetan aurrerapausoak emateko 'aitzakia' gisa erabiltzea.
AGENTZIAK | ERREDAKZIOA
Ameriketako Estatu Batuen (AEB) eta Iranen arteko tentsioak gora egiten jarraitzen du. AEBko Gobernuak atzo iragarri zuenez, zigorrak ezarri dizkio Irango Espazio Agentziari, eta baita bertako bi ikerketa instituturi ere.
"AEBk ez dio utziko Irani programa espaziala misil balistikoen programan aurrerapausoak emateko aitzakia gisa erabiltzen", adierazi du Mike Pompeo AEBko Estatu idazkariak ohar baten bidez.
Zigor berriak iragarri ostean, AEBko herritarrek eta enpresek debekatuta izango dute Irango Espazio Agentziarekin harremanik izatea, eta AEBren jurisdikziopean izan ditzakeen aktiboak blokeatuko ditu.
AEBk zigorrak ezarri dizkie aurretik Irango misil balistikoen programarekin lotutako erakundeei.
Teherango eta Washingtongo gobernuen arteko tentsioak gora egin du Trumpek maiatzean hautsi ostean AEBk 2015ean Iranekin sinatutako akordio nuklearra. Horren ondotik, AEBk zigorrak ezarri dizkio Irani.
