Mundua -
Koronabirusa
Indiako 1.300 milioi herritarrek etxean egon beharko dute hiru astez
Indiako lehen ministroaren esanetan, "21 egun etxean egon behar izatea denbora asko izan daiteke, baina mundu guztia salbu dagoela bermatzeko modu bakarra da".
Agentziak | Erredakzioa
Narendra Modi Indiako lehen ministroak iragarri duenez, gauerditik aurrera eta hiru astez "erabateko" konfinamendua egongo da indarrean herrialdean, koronabirusa hedatzea saihesteko, eta horrek esan nahi du munduko itxialdirik handiena izango dela, 1.300 milioi pertsonari eragingo baitie.
"India salbatzeko" ezinbesteko neurria dela ziurtatu du Modik NDTV telebista-katean emandako hitzaldian, eta hurrengo 21 egunetan etxetik ez irteteko eskatu die herritarrei. Izan ere, hurrengo 21 egunetan pandemiari aurre egiteko gai ez badira, herrialdeak 21 urte egingo duela atzera esan du. "21 egun etxean egon behar izatea denbora asko izan daiteke, baina mundu guztia salbu dagoela bermatzeko modu bakarra da", azpimarratu du.
Modik distantziak errespetatzeko ere eskatu die herritarrei, kontuan izan beharreko prebentzio-neurri hori ez baita "gaixoentzat bakarrik". "Besteengandik urruntzea da koronabirusaren aurka borrokatzeko modu bakarra. Herritar guztientzat da mezua, familia guztientzat, baita lehen ministroarentzat ere", gaineratu du.
Horren harira, kutsatutako pertsona bakar batek aste gutxitan ehunka lagun kutsa ditzakeela ohartarazi du, bere esanetan, birusa "sua bezala zabaltzen baita". Indiako agintariek 500 kasutik gora baieztatu dituzte orain arte, eta bederatzi hil dira COVID-19 gaitzaren eraginez.
Indiako gobernuburuak azpimarratu duenez, herrialdean ezarri berri duten prebentzio-neurria indarrean dagoen bitartean oinarrizko hornidurak bermatuta egongo dira, eta osasun sistema indartzeko baliabide gehiago bideratuko dituzte. Azken astean, hiri handietan blokeoak ezarri dituzte, eta garraiobideak eten.
