Mundua -

Ameriketako Estatu Batuak

Azken agurra eman diote George Floydi AEBn, hileta-elizkizunean "aldaketa" eskatuz

Haren familiaren gonbidapena jaso duten 500 pertsona inguru joan dira Floydi azken agurra emateko hileta-elizkizun pribatura. Koronabirusaren ondorioz, elizaren edukieraren laurden bat bete da.

George Foydi azken agurra emateko hileta-elizkizuna. Argazkia: EFE
George Foydi azken agurra emateko hileta-elizkizuna.
Azken agurra egin diote George Floydi, Houstonen

1:00

Agentziak | Erredakzioa

Whatsapp Facebook Twitter Telegram Email

George Floydi azken agurra emateko hileta-elizkizuna egin dute astearte honetan Houstonen (Texas), eta bertan izan dira haren senideak, lagunak eta tokiko agintariak. Otoitz eta abesti artean, haren "izaera baketsua" gogora ekarri, eta justizia eskatu dute gertatutakoagatik; izan ere, polizia batek Minneapolisen atxilotu zuen unean hil zen. Horrez gain, arrazakeriarekin amaitzeko "aldaketa" eskatu dute gizartean.

Haren familiaren gonbidapena jaso duten 500 pertsona inguru joan dira Floydi azken agurra emateko hileta-elizkizun pribatura. Izan ere, koronabirusak eragindako pandemiaren ondorioz, elizaren edukieraren laurden bat betetzeko aukera egon da bakarrik.

Horrek ez du saihestu, ordea, bere jaioterriko The Fountain of Praise (Gorespenaren Iturria) elizan azken agurra ematea. Gainera, tokiko telebista askok zuzenean eman dute hileta-elizkizuna, azken egunetan AEBn haren heriotzagatik protesta egiteko izandako protesta jendetsuen ostean.

"Ezin diogu aldaketari bizkarra eman, ez dugu hori egin behar. Ezin dugu aukera hau atzean utzi pentsatuz gure arimak mintzen dituen arrazakeriari berriro ere bizkarra eman diezaiokegula, oraindik ere estatubatuarren bizitzari eragiten dion gehiegikeria sistemikoa baita", esan du hileta-elizkizunean Joe Biden AEBko presidente izateko hautagai demokratak bideoz grabatutako mezu batean.

Biktimaren senideak zuriz jantzita joan dira, eta haren "gizatasuna eta izaera baketsua" nabarmendu dituzte. Ildo horretatik, hura atxilotu zutenean esan zuen azken esaldia ("Ezin dut arnasarik hartu") gogora ekarri dute, polizia batek belauna bederatzi minutuz lepoan jarrita hil baitzen.

"Nik arnasa hartu dezaket (...), baina justiziarik gabe ezin da bakerik egon", esan du Floyden iloba batek, haren anaia batek mikrofonoa hartu du eta "Floyden heriotzak mundua aldatuko du", nabarmendu du.

Elizara iristean, Houstongo Polizia Departamentuko kideek korridore bat osatu dute eta Floydi ohoreak egin dizkiote, haren senideek urrez bainatutako hilkutxa barrura sartu duten bitartean.

Kanpoan, berriz, bizilagun ugari bildu dira, maiatzaren 25ean Minneapolisen hil zen afro-amerikarraren heriotzagatik atsekabea eta haserrea adierazteko. Izan ere, ustez 20 dolarreko billete faltsu bat erabili izana leporatuta atxilotu zuten.

Floyd Mayweather boxeolari estatubatuarrak osorik ordaindutako hileta-elizkizunaren ostean, George Floyden gorpua Houston Memorial Garden hilerrira eraman dute, zaldiek tiratutako gurdi zuri batean, amaren gorpuzkiekin batera lurperatzeko.

Hau zure interesekoa bada, baliteke beste gai hauek ere izatea
Nazioartea New York Ameriketako Estatu Batuak Arrazismoa Eguneko albisteak Albisteak Manifestazioak Giza eskubideak